Аҟәа. Ажьырныҳәамза 20, 2024 шықәса. Аԥсныпресс. Иахьа ашьыжьымҭан израильтәи ар х-ракетак рыла Шьамтәыла аҳҭнықалақь Дамаск, Меззе аҳаблаҿы игылоу ԥшь-еихагылакны иҟоу аиланхарҭаҩны иалахысит, ҳәа адырра ҟанаҵоит Аԥсны адәныҟатәи аусқәа Рминистрра Амедиацентр.
Иазгәаҭатәуп, аиланхарҭаҩны зырбгаз Израиль аганахьала аракетатә агрессиа ахьыҟалаз аҭыԥи Аԥсны Ацҳаражәҳәарҭа ахьыҟоу ахыбреи 150 метра рыбжьоуп.
Шьамтәыла иҟоу Аԥсны ацҳаражәҳәаҩ Маҳаммад Али Ацҳаражәҳәарҭа аусзуҩцәа рҟынтәи аӡәгьы ааха имоуӡеит ҳәа адырра ҟаиҵоит.
«Аракетала алахысра аныҟала аамҭазы сареи гәыԥҩык Ацҳаражәҳәарҭа аусзуҩцәеи Ацҳаражәҳәарҭа аҩныҵҟа ҳаҟан. Ҳара иҳауз ацәаныррақәа ртәы аҳәара уадаҩуп», - ҳәа иҟалаз ахҭыс дахцәажәеит ацҳаражәҳәаҩ.
Иҟоу адыррақәа рыла, аракетатә атака иахҟьаны жәаҩыла ауаа ҭахеит.
*Меззе аҳаблаҟны Шьамтәыла аус зуа аҳәаанырцәтәи адипломатиатә хаҭарнакрақәа реиҳарак ыҟоуп.
