Аҟәа. Лаҵарамза 4, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа I Кавказтәи аинвестициатә цәыргақәҵа– «АКАО аекономикатә лшара. Амакрорегион аҿиараҟны аинвестициақәа рроль» апленартә еилатәара ихы алаирхәит, ҳәа адырра ҟанаҵоит Аҳәынҭқарра Ахада ипресс-маҵзура.
Аапленартә еилатәара аҿы ажәахәқәа ҟаҵаны иқәгылеит Урыстәылатәи Афедерациа Аиҳабыра Ахантәаҩы ихаҭыԥуаҩ Алеқсандр Новак, Урыстәылатәи Афедерациа аекономикатә ҿиара аминистр Мақсим Решетников, Акционертә Еилазаара "Н.И. Ткачиов ихьӡ зху агрокомплекс афирма" адиректорцәа рхеилак ахантәаҩы Алеқсандр Ткачиов, ИАО "Ааглыхеимадарабанк" ахантәаҩы Пиотр Фрадков, Акционертә Еилазаара " УА. Аҩны" адиректор хада Витали Мутко, уҳәа убас аӡәырҩы.
Нхыҵ-Кавказтәи Афедералтә Округ асубиектқәа рнапхгаҩцәа рхы аладырхәит Нхыҵ-Кавказ аҿира иадҳәалаз азҵаарақәа, иара убас аекономикмтә потенциал аартразы аҭагылазаашьа.
Иахьа Актәи Кавказтәи аинвестициатә цәыргақәҵа аусура хнаркәшоит.
Зынӡа ацәыргақәҵа аусура иалахәын аҳәаанырцәтәи аҳәынҭқаррақәа 14 рҟынтәи асасцәа: Азербаџьан, Венесуелы, Израиль, Иран, Казахсҭан, Катар, Аԥсны Аҳәынҭқарра, Кипр Ареспублика, Алада Уаԥстәыла Арреспублика, Сербиа, Словениа, ЕАА, Таџьикисҭана, Шри-Ланка.
