Аҟәа. Ԥхынгәымза 7, 2023 шықәса. Аԥсныпресс. Аԥсны иҟоу Урыстәылатәи Афедерациа Ацҳаражәҳәарҭа аҿы ахәаша, ԥхынгәымза 7 рзы аҭаацәареи абзиабареи гәык ала аҟазаареи Рымш азгәаҭара инамаданы, аԥснытәи ԥшь-ҭаацәарак “Абзиабареи гәык ала аҟазаареи рзы” амедалқәа ранашьахеит. Убас агәаларшәагатә ҳамҭақәа ранашьахеит: Константини Иринеи Думаа, Геворки Варсеники Гаранианаа, Константини Наталиеи Еидис, иара убас Виталии Хаҭунеи Смыр.
Аныҳәатә усмҩаԥгатә аартуа, Аԥсны иҟоу Урыстәыла аус ацура Ахаҭарнакра анапхгаҩы Дмитри Федотов, Аҭаацәа Рымш – ари даара аԥхарра зҵоу ныҳәоуп, уи 25 шықәса иреиҵамкәа еицынхо аҭаацәа ирызкуп ҳәа иазгәеиҭеит.
«Ари аныҳәа араҟа, Аԥсны даара аҵак ду амоуп, избан акәзар шәтәыла аҿы аизыҟазаашьатә хәдуқәа реиқәырхареи аҭаацәаратә традициақәеи аҵасқәеи ес еиҵагыло абиԥарақәа рызнагареи иашьҭоуп. Уи даара акыр аҵанакуеит. Есышықәса ҳара ԥшь-ҭаацәарк алаҳкаауеит. Сара агәра ганы сыҟоуп аринахысгьы ари зеиӷьаҟам атрадициа шьахә шацҵахо», - ҳәа инаҵшьны иазгәеиҭеит иара.
Дмитри Федотов аҳамҭақәа занашьахаз аныҳәа рыдиныҳәалеит, ирзеиӷьаишьеит аманшәалара, аилибакаара, агәабзиареи агәамчи аизҳазыӷьареи.
Аԥснытәи Аиашахаҵаратә Уахәама ахада Виссарион Аԥлиаа иахьа Иоанн Аӡаахҩы Иира Амшгьы шазгәарҭо еизаз иргәалаиршәеит.
«Сара исҭахуп иахьа араҟа иалкааз аҭаацәа егьырҭ зегьы рзы иҿырԥшыганы иҟаларц. Ҳаҭыр зқәу сашьцәа, саҳәшьцәа, гәык ала ишәзеиӷьасшьоит аҭынчра, анасыԥ, агәабзиара, аизҳазыӷьара», - ҳәа иҳәеит иара.
«Абзиабареи гәык ала аҟазаареи рзы» Амедал Урыстәылатәи Афедерациа аҿы «Аҭаацәеи абзиабареи гәык ала аҟазаареи Рымш» аиҿкаареи амҩаԥгареи рзы Аиҿкааратә комитет ала иаԥҵоу уаажәларратә ҳамҭоуп. Ари амедал ранашьахоит Урыстәыла атәылауааи аҳәаанырцәтәи атәылауааи – 25- шықәса иреиҵамкәа еицынхо, зҭаацәаратә маншәаларала, аилибакаареи абзиабареи, гәык ала аизыҟазаареи рыла еицырдыруа, иара убас еидгыланы зхәыҷқәа ауаажәларратә лахәыла иашақәаны, пату зқу уааны изааӡаз хаҵеи ԥҳыси.
