Аҟәа. Рашәарамза 19, 2024 шықәса. Аԥсныпресс. Рашәарамза 24 – 28 рзы агрессиа ашәарҭареи аибашьратә аамҭеи ҟалозар азы Аԥсны Арбџьармчқәа рнапхгараҭара азы аштабтә арратә зыҟаҵарақәа мҩаԥыслоит.  

Арратә зыҟаҵарақәа Аԥсны Аҳәынҭқарра Арбџьармчқәа Ркомандаҟаҵаҩ Хада – Аҳәынҭқарра Ахада Аслан Бжьаниа идҵеи атәылахьчара аминистр, аинрал-полковник  Владимир Ануа аԥхынтәи аамҭахәҭа азы Арбџьармчқәа разыҟаҵара азы идикылаз аӡбамҭеи  инарықәыршәаны, Аԥсны Арбџьармчқәа Рыштаб Хада аиҳабы,  аинрал-леитенант  Владимир Савченко инапхгарала имҩаԥысуеит.

Аҟәа. Рашәарамза 19, 2024 шықәса. Аԥсныпресс. Аԥсны акультура аминистр инапынҵақәа назыгӡо Динара Смыри аскульптор Руслан Габлиеи атәыла аԥыза-министр Асовет Еидгыла Афырхаҵа Варлам Габлиа ибаҟа апроект аус адулара шымҩаԥысуа азы адырра ирҭеит.

Апроект аус адырулоит аскульпторцәа – Амиран Адлеибеи Руслан Габлиеи. Урҭ  еиуеиԥшым авариантқәа рҟынтәи иазинтересу аганқәа еиҳа иргәаԥхаз акы алырхит.

1941-1945 шш. Аџьынџьтәылатәи еибашьра Дуӡӡа аветеран 1,1 метра ишьҭыху ибиуст 1,8 метра агылара змоу апостамент иқәыргылахоит.

Аԥыза-министр акультура Аминистрра анапхгареи аскульпторцәеи аусурақәа зегьы ҳазҭоу ашықәс нҵәаанӡа хымԥада ихыркәшазароуп ҳәа ргәырҽаниҵеит.  

Варлам Габлиа ибаҟа ргылахоит Очамчыра ақалақь аҿы.

Аҟәа. Рашәарамза 19, 2024 шықәса. Аԥсныпресс. Аимадареи амассатә коммуникациақәеи ацифратә ҿиареи рзы Аҳәынҭқарратә Еилакы ахантәаҩы Роланд Берулаа атәыла аԥыза-министр Алеқсандр Анқәаб  «Аҳәынҭқарратә информациатә ресурсқәеи адыррақәа реизаки рыхьчареи рхархәареи рышьақәгылареи рыҵәахреи рзы иаку асистема аԥаҵара» иазку «Ахылаԥшратә иҽҳәарабжьаратәу ахықәкытә программа ашьақәырӷәӷәара азы» атәыла Анапхгара Ақәҵара аганӡара шымҩаԥысуа азы адырра ииҭеит.    

Апрограмма х-етапкны анагӡара азԥхьагәаҭоуп, уи хыркәшахароуп ԥхынҷкәынмза, 2025 шықәса рзы. Уи ахықәкы хадақәа иреиуоуп – ареспублика аҿы «ҭыԥк адҵаалара» апринцип ала ауааԥсыра аҳәынҭқарратә маҵзурақәа рынагӡара аганахьала ацхыраара рыҭара иазку амаҵзура аԥҵара. Ас еиԥш иҟоу амаҵзура аҿырԥшы ҳасабла иааугар алшоит урыстәылатәи афункциарацәатә центрқәа.

Аҟәа. Рашәарамза 19, 2024 шықәса. Аԥсныпресс. 29 503 кьыла аҵыҵындра Аԥснынтәи Урыстәылаҟа идәықәҵан ҳазҭоу ашықәс азы.  

Иҳаҩсыз ашықәс аиԥш-зеиԥшу аамҭахәҭа азы иргеит  48 741 кьыла аҵыҵындра.

Иҳаҩсыз ашықәс иаҿырԥшны ари аргәыц аекспорт 39,5 % рыла еиҵахеит.

Аҟәа. Рашәарамза 19, 2024 шықәса. Аԥсныпресс. Рашәарамза 19 рзы Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҿы аԥснытәи аспортсменцәа х-дисциплинак – ашахматқәа,  абырзен-римтәи аиқәԥара, абокс рыла аицлабрақәа ирылахәхеит, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.  

Иахьа имҩаԥысуеит ашахматтә турнир аҩбатәи амш, аспортсменцәа «блиц» аформат ала жәеиза партиа рыла ахәмаррақәа рзыԥшуп.

«Акоманда алҵшәа бзиақәа раарԥшреи амедалқәа ргареи рҽазыршәоит», - ҳәа иазгәеиҭеит аԥснытәи ашахматистцәа разыҟаҵаҩ Альберт Карапетиан.

Аԥснытәи акоманда аилазаараҿы иҟоуп –  Оҭар Хәырхәмал, Асиа Арҩыҭаа, Деиа Амҷба, Руслан Ӡиаԥшьба.

Иахьаҵәҟьа абырзен-римтәи аиқәԥара азы афиналбжатәии заанаҵтәи аиндаҭларақәа мҩаԥысраны иҟоуп. Аԥсны ахьӡала иқәгылоит Рамазан Арапханов, Ерик Кәакәасқьыр, Иван Хорошилов, Руслан Кәыҵниа, Ҭемыр Инаԥшьба. Аиқәԥаҩцәа рызыҟаҵаҩ –  Размик Алабиан.

Аҟәа. Рашәарамза 18, 2024 шықәса. Аԥсныпресс.  Иҭыҵит алитература-сахьаркыратә, ауаажәларра-политикатә журнал «Алашара» ахԥатәи аномер.

Араздел хә-хәҭак аиубилеитә рыцхәқәа ирызкуп: аԥсуа литература ашьаҭаркҩы Дырмит Гәлиа диижьҭеи 150-шықәса аҵра, Асовет Еидгыла жәлар рартист Шәарах Ԥачалиа диижьҭеи 110-шықәса аҵра, апублицист Иури Лакрба диижьҭеи 90-шықәса аҵра, ашәҟәыҩҩы, ауаажәларратә усзуҩ Геннади Аламиа 75-шықәса ихыҵра, ашәҟәыҩҩы Еҭери Басариа диижьҭеит 75-шықәса аҵра, апоет Иван75-шықәса ихыҵра.

Ажурнал иара убас ианылеит аԥсшәахь еиҭагоу   Алеқсандр Вампилов  ипиеса «Аԥа еиҳабы» («Старший сын») - (еиҭеигеит Геннади Аламиа), иара убас Антон Чехов иажәабжь «Ачынуаҩ иԥсра» («Смерть чиновника») - (еиҭеигеит Енвер Ажьиба).  

Арубрика «Аҿар рыбжьы» аҿы икьыԥхьхеит Џьамбул Инџьгиа иажәеинраалақәа.

Арубрика «Апублицистика» аҿы икьыԥхьхеит Руслан Қаԥбеи Борис Қаџьааи рыстатиақәа.  

Ажурнал аҿы иара убас иҟоуп «Аԥхьаҩцәа ражәеинраалақәа» ҳәа арубрика.  Уажәазы уи иалалеит Лиубовь Черқьезиеи Мадина Дараселиеи ражәеинраалақәа.

2024-тәи ашықәс Аԥсны Дырмит Гәлиа ишықәсны ирылаҳәоуп. Жәабранмза 21 рзы аԥсуа ҩыратә литература ауасхыр шьҭазҵаз Дырмит Гәлиа диижьҭеит 150 шықәса ҵуеит. Ажурнал аҿы икьыԥхьуп  Дырмит Гәлиа изку Анатоли Лагулааи Белла Барцыцԥҳаи ражәеинраалақәа, Ельвира Арсалиа лыстатиа «Дырмит Гәлиа аԥсуа сахьаркыратә рҿиара аҿы» («Дмитрий Гулиа в абхазском художественном творчестве»), иара убас Енвер Ажьиба иажәабжь «Егьа ус иҟазаргьы».

Ажурнал ианылаз Еҭери Басариа лажәабжь «Амҩа» («Путь») аԥсшәахь еиҭеигеит ашәҟәыҩҩы Алықьса Гогәуа.

Аҟәа. Рашәарамза 18, 2024 шықәса. Аԥсныпресс. Гагра ақалақь аҿы аиқәыршәазааратәи ариаҵәаратәи аусурақәа ирыцҵоуп, ҳәа адырра ҟанаҵоит Гагра араион Ахадара аофициалтә саит.

Гагра имҩаԥысуа аиқәршәазааратә усурақәа ртәы еиҭеиҳәеит Гагра ақалақь ахада ихаҭыԥуаҩ Адамыр Цышба. 

Ақалақь аиқәыршәазаара акыр аҵанакуеит аинвесторцәеи атуристцәеи радыԥхьалара азы адагьы иара ақалақь ауааԥсыра рхаҭақәагьы рзы. Гагра ақалақь аҿы 2021 шықәса инаркны апаркқәа, аскверқәа, ашьаҟамҩақәа рырҽеиратә усурақәа мҩаԥысуеит.  

«Абазгаа рымҩа акаҭран ақәҵара хыркәшахеит. Анаҩс иазԥхьагәаҭан ашьаҟамҩақәа рырҽеира, арлашагатә шьаҟақәа рыргылара, уи аамышьҭахь ариаҵәаратә усурақәа рымҩаԥгара. Абазгаа рымҩа ахәҭак аҿы иҳаҩсыз ашықәс азы аҷамҳа ҵла аллеиа еиҭаҳан», - ҳәа иазгәеиҭеит Адамыр Цышба.

Абазага рымҩа егьи ахәҭа аҿы ҳазҭоу ашықәс хәажәкырамзазы вашингтони ҳәа изышьҭоу аҵиаақәа раллеиа ҟалеит. Еиҭаҳаз, зоура 3 метрак рҟынӡа инаӡоз апальмақәа аднакылеит.  Аҵиааақәа аекологцәа рабжьгара инақәыршәаны иааиԥмырҟьаӡакәа аус рыдырулоит.  Аҵиаақәа ҳаамҭазтәи ақалақь аландшафт аԥҵара аҿы акыр зҵазкуа архитектуратәи акомпозициатәи ароль нарыгӡоит.

Аҟәа. Рашәаамза 18, 2024 шықәса. Аԥсныпресс. Аԥснытәи аиқәԥаҩ Даниил Харчлаа Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҿы зхы иақәиҭу аиқәԥаразы аицлабрақәа рҿы аџьазтә медал игеит.

Аџьазтә медал агаразы аиндаҭлара аҿы иара 65 кьыла иҟоу акапантә категориа иаҵанауа Китаитәи аспортсмен асчиот 11:0 ала дииааит, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.

Аҟәа. Рашәарамза 16, 2024 шықәса. Аԥсныпресс. Рашәарамза 15-16 рзы иацҵахеит традициала еиҿкаахо

Ареспубликатә хәыҷтәы реитингтә шахматтә еицлабрақәа Алашара – иқәыԥшу агәыӷрақәа».

100-ҩык рҟынӡа ахәыҷқәа злаху арҭ аицлабрақәа мҩаԥгахоит Аԥсны аҿари аспорти русқәа рзы Аҳәынҭқарратә Еилаки Аҟәа ақалақь Ахадареи иҟарҵо адгылара иабзоураны.

Аҟәа. Рашәарамза 16, 2024 шықәса. Аԥсныпресс. Аԥсны иқәынхо аԥсылманцәа, адунеи зегьы аҿы аԥсылмантә дин ныҟәызго зегьы реиԥш, сынтәа рашәарамза 16 иақәшәаз, аԥсылмантә ныҳәа хадақәа ируаку  Кәырбанныҳәа азгәарҭоит. Кәырбанныҳәа, мамзаргьы араб бызшәала - Ид аль-Адха —аԥсылманцәа рныҳәа хадақәа ируакуп, аҳаџьныҟәара хнаркәшоит. Аҳаџь - аԥсылманра ахәбатәи ашьаҭоуп. Кәырбан-Баирам аныҳәа акәзар, зуль-хиджа амза а-10-тәи амш (аԥсылманцәа рымзар ала а-12-тәи амза) ауп иаанаго.) Кәырбан-Баирам — ԥсыламан ныҳәоуп, иазгәарҭоит аныҳәа Ураза-Баирам ашьҭахь 70 мшы анҵлак. Аԥсны иара ахатәы милаҭтә хьӡы амоуп – Кәырбанныҳәа. Уи иусуратәым ныҳәамшны ирылаҳәоуп.

Традициала ишаԥу еиԥш, Кәырбанныҳәа аҽны аҟәатәии гәдоуҭатәии аџьамаақәа рҿы ашьыжь шаанӡа  анамаз мҩаԥыргеит, аныҳәатә абжьагажәа иаԥхьеит.  

Аԥсны аԥсылманцәа Иаку рдоуҳатә Напхгараҭара амыфҭы ареспублика иқәынхо аԥсылманцәа Кәырбанныҳәа инамаданы дрыдныҳәалеит.

Адныҳәалараҿы, ахәҭакахьала иазгәаҭоуп:

«Ҳаҭыр зқәу сашьцәеи, саҳәшьцәеи, Аԥсны аԥсылманцәа!

Аԥсны аԥсылманцәа Иаку рдоуҳатә Напхгараҭара ахьӡала, хаҭала сара сыхьӡала гәык-ԥсыкала хәыҷи-дууи зегьы ишәыдысныҳәалоит Аԥсылман зинхаҵара ныҟәызго зегьы рзы ихадоу аныҳәақәа иреиуоу - Кәырбанныҳәа (Курбан-Байрам).

Зегь Зымчу Аллаҳ сиҳәоит шәара иҟашәҵази ҳара иҟаҳҵази аԥсаҭатә, аматанеирақәа, хра злоу аусқәа идикыларц, ҳагәнаҳарақәа ҳанеижьарц, амҩа иаша ҳирбарц!

Аллаҳ сиҳәоит доусы ҳагәқәа аразреи, арыцҳеибашьареи, ачҳареи абзиабаралеи рзы иаатны иҟаларц, ҭаацәаныла зегьы аилибакаареи аманшәалареи ҳаурц!

Иа, Аллаҳ! Улԥха, угәыԥха ҳацзааит! Ҳтәылаҿы  ашәарҭадареи аҭынчреи шьақәгылааит,  аизҳазыӷьара ҟалааит»!»