Аҟәа. Абҵарамза 16, 2022 шықәса. Аԥсныпресс. Ахаша, абҵарамза 16 рзы Апарламент аҟны имҩаԥысит Венори Бебиа хантәаҩра ззиуаз Аԥсны Жәлар Реизара-Апарламент Акультуреи, аҿар русқәеи, аспорти рзы аилак аилатәара. 

Аилак аилатәара иалахәын Акультура аминистр Даур Ақаҩбеи Аха Иадминистрациа аҳәынҭқарра-зинтә усбарҭа аиҳабы Наҭела Ламиеи.

Адепутатцәа ахәаԥшит «О внесении изменений в Закон Республики Абхазия «Аԥсны Аҳәынҭқарра аҳәынҭқарратә ҳамҭақәеи аҳаҭыртә хьыӡқәеи рзы « Аԥсны Аҳәынҭқарра Азакәан аԥсахрақәа ралагаларазы» азакәан апроект.

Аҟәа. Абҵарамза 15, 2022 шықәса. Аԥсныпресс. Аԥыза-министр Алеқсандр Анқәаб ахәаԥшразы изнагахеит Аҳәынҭқарра Ахада Аслан Бжьаниа идҵа инақәыршәаны аусмҩаԥгатәқәа рымҩаԥгареи уаанӡа иазԥхьагәаҭаз асоциал-культуратә зкызаара змоу аобиектқәеи рҿы аиҭашьақәыргыларатә усурақәа рынагӡареи рфинанстәра шымҩаԥысуа азы абжьакӡаратә ҳасабырба.

Аԥыза-министр ихаҭыԥуаҩ, афинансқәа рминистр Владимир Делба афинанстәра аҿы аиҵахарақәа ыҟаӡам ҳәа иазгәеиҭеит.

 Уи иҟаиҵаз адыррақәа рыла, Аҳәынҭқарра Ахада идҵақәа рынагӡара азы 2022 шықәса инаркны абиуџьеттә хархәагақәа маҷымкәа  агәабзиарахьчареи асоциалтә усхки рахь идәықәҵахеит.

1 138 – ҩык зныктәи аматериалтә цхыраара аҭара азы иазоужьхеит 74,5 млн. мааҭ, 37 млн. мааҭ ақәхарџьхеит  327-ҩык рыхәышәтәра, аҷаҷа чымазара змоу ауаа рыхәышәтәра азы иазоужьхеит  86,8 млн. мааҭ.

Аҟәа. Абҵарамза 15, 2022 шықәса. Аԥсныпресс. Аԥсны Иҷыдоу аҭагылазаашьақәа рзы Аминистрра амедицинатә Усбарҭа аусзуҩцәа ирласу амедицинатә цхыраара аҭара азы ирымоу адыррақәа рыҩаӡара ашьҭыхра иазку аҽазыҟаҵарақәеи ҳаамҭазтәи амединатә техника ахархәаразы ирымоу аԥышәа агәаҭареи мҩаԥыргеит. Азыҟаҵарақәа рахь адыԥхьалара роуит амедицинатә Усбарҭа хаҭалатәи аилазаара зегьы, Иҷыдоу аҭагылазаашьақәа рзы Аминистрра араионтә ҟәшеиҵақәагьы уахь иналаҵаны, ҳәа иаанацҳауеит Ахылаԥшырҭа аофициалтә саит.

Аҟәа. Абҵарамза 15, 2022 шықәса. Аԥсныпресс.  Аԥсны афинансқәа Рминистрра абиуџьеттә ҳасабырба автоматизациа азы азыҳәамҭақәа рыдкылара аҽҳәара ишацнаҵо азы адырра ҟанаҵоит.

Аҟәа. Абҵарамза 15, 2022 шықәса. Аԥсныпресс. Адепутатцәа АИХ рхаҭарнакцәа Москва имҩаԥысыз аиҿцәажәарақәа рылҵшәақәа ртәы рзеиҭарҳәеитИахьа адепутатцәа Алхас Барцыц, Кан Кәарҷиа, Леонид Лакербаиа, Дауҭ Хәытаба  Апарламент аҟны АА Аиҳабыреи УА Аиҳабыреи рыбжьара Аԥсны Аҳәынҭқарраҟны иҟоу аобиект ахатәтәразы УА аҭареи уи ахархәара аԥҟарақәеи рзы Аиқәшаҳаҭра ашьақәырӷәӷәара азҵаара иазкыз апресс-конференциа мҩаԥыргеит.

Абҵарамза 10 рзы имҩаԥысит Ихьыԥшым Аҳәынҭқаррақәа Реиҩызара аусқәа рзы Аҳәынҭқарратә Дума Аилак инарҭбаау аилатәара. Уи хантәаҩра азиуан УА Афедералтә Еизара Аҳәынҭқарратә Дума ахантәаҩы ихаҭыԥуаҩ Сергеи Неверов.

Аилатәара аԥсуа ган аҟнытә иалахәын Жәларбжьаратәии апарламентбжьаратәи еимадарақәеи аџьынџьуаа рымадареи рзы аилак ахантәаҩы Алхас Барцыц, Аԥсны Жәлар Реизара-Апарламент Аҳәынҭқарра-зинтә политиказы аилак ахантәаҩы Дауҭ Хәытаба , Аԥсны Жәлар Реизара-Апарламент Абиуџьети, акредиттә еиҿкаарақәеи, ашәахтәқәеи, афинансқәеи рзы аилак алахәҩы Леонид Лакербаиа, Аԥсны Жәлар Реизара-Апарламент Аҳәынҭқарра-зинтә политиказы аилак алахәцәа Адгәыр Ҳаразиеи Кан Кәарҷиеи, иара убас АА Адәныҟатәи аусқәа рминистр Инал Арӡынба.

Аҟәа. Абҵарамза 14, 2022 шықәса. Аԥсныпресс. Аԥыза-министр Алеқсандр Анқәаб атәыла аҵареи абызшәатә политикеи рминистр Инал Габлиа дидикылеит. Ахылаԥшырҭа ахада урыстәылатәи рколлегацәа рымадара алҵшәақәа рзы уахь иналаҵаны, иааизакны Аминистрра ахылаԥшрала имҩаԥысуа аусура азы аҳасабырба ҟаиҵеит.

Аминистр иажәақәа рыла, анапхгарабжьаратәи аусеицура аҳәаақәа ирҭагӡаны, ареспублика ахь иаашьҭын 40 нызықь инарзынаԥшуа аиҳабыратә классқәа рзы арҵага шәҟәқәа. Уажәы Аминистрра урҭ ашколқәа рахь аихшара мҩаԥнагоит.

Аҟәа. Абҵарамза 16, 2022 шықәса. Аԥсныпресс. «Уажәы аԥыза-министр ихаҭыԥуаҩ, аекономика аминистр Кристина Озган амаҵураныҟәара аҳасабала Москва дыҟоуп, ареспублика ахь афымцамч аагара иазкны аиҿцәажәарақәа мҩаԥылгоит.  Аԥныҟа дшаалакҵәҟьа, Кристина Озган Аԥсны амассатә информациа ахархәагақәа русзуҩцәа Рассациа (АРСМИРА) аҿы имҩаԥыыз апресконференциа аҿы аминистрра аҿы ишьақәырӷәӷәаз аиқәыршәагақәа рсиа зну аусшәҟәи аԥаратә хархәагақәа инамыцхәны рарбареи инамаданы илыдҵыз ахара инарҭбааны далацәажәараны дыҟоуп». Абас еиԥш адыррақәа Аԥсныпресс ахь иаанацҳаит  аекономика Аминистрра апресс-маҵзура.  

Аҟәа. Абҵарамза 16, 2022 шықәса. Аԥсныпресс.  Абҵарамза 19 рзы, Бзыԥтәи аҽырҩырҭа аҿы аҽыбӷаҟазаратә спорт азы Аԥсны Ачемпионат мҩаԥысуеит.

Аусмҩаԥгатә аиҿкааҩцәа – Аԥсны аҿари аспорти рзы аҳәынҭқарратә Еилаки Аԥсны аҽыбӷаҟазаратә спорт Афедерациеи..

Аицлабрақәа рымш апрограмма иалагалоуп Асовет Еидгыла аспорт азҟазацәа Оҭар Ҷанба, Авксенти Ҭарба, Алеқсеи Лакрба, иара убас жәларбжьаратәи акласс змоу аспорт азҟаза  Харлам Симониа раԥхьахәқәа ргара азы 1 400, 1 600, иара убас 2 000 метра рҟынӡа аҽырыҩратә еиԥхныҩлара.

Аҟәа. Абҵарамза 16, 2022 шықәса. Аԥсныпресс. Апроект «Урыстәылеи Аԥсни реимадаратә акультуратә усмҩаԥгатәқәа» аҳәаақәа ирҭагӡаны, абҵарамза  17 рзы,  С. Ҷанба ихьӡ зху Аԥснытәи аҳәынҭқарратә драматә театр аҿы,  имҩаԥгахоит урыстәылазегьтәии жәларбжьаратәии аконкурсқәа рлауреат Дмитри Маслеев имастер-класс.  Еицырдыруа апианист уи мҩаԥигоит А. Чичба ихьӡ зху Аҟәатәи аҳәынҭқарратә музыкатә ҵараиурҭа астудентцәеи  амузыкатә школқәа рҵаҩцәеи рзы, ҳәа адырра ҟанаҵоит акультура Аминистрра апрес-маҵзура.

Абҵарамза 18, асааҭ 19:00 рзы, Р. Д. Гәымба ихьӡ зху Аԥснытәи аҳәынҭқарратә филармониа аҿы имҩаԥысуеит  Дмитри Маслеев исолотә концерт,араҟа иарҳәахоит Л. Бетховен, П.И. Чаиковски, С.В. Рахманинов рырҿиамҭақәа.

Аҟәа. Абҵарамза 16, 2022 шықәса. Аԥсныпресс. Урыстәылатәи аҭоурыхтә еилазаара (УАЕ) Аԥсны раԥхьатәи аҳәаанырцәтәи аҟәшаа аартра азԥхьагәанаҭоит. Абри азы аҩаша, абҵарамза 15 рзы ТАСС ахь адырра ҟаиҵеит УАЕ анапхгараҭара ахантәаҩы, Афонд «Аԥсадгьыл аҭоурых» анагӡаратә директор   Константин Могилевски.

«Сгәы иаанагоит, ҳара Урыстәылатәи аҭоурыхтә Еилазаара аҟәша Аԥсны аартра аганахьала ҳусура лыҵшәа бзиала ихыркәшахоит ҳәа. Уи азы заанаҵтәи аилацәажәарақәа мҩаԥысхьеит. Аԥснытәи ҳколлегацәа рҟынтәи аофициалла ааԥхьара ҳазыԥшуп», - ҳәа астол гьежь «Урыстәылатәи Амшынеиқәаҿықә аҭоурых: Урыстәылатәи Афедерациа иҿыцу асубиектқәеи аиҩызаратә ҳәынҭқаррақәеи иаку аҭоурыхтә ҵакыра аҿиара иадҳәалоу апроцесс ралагалара» аҿы дықәгыло  иҳәеит Константин Могилевски.

Астол гьежь алахәыла – Аԥсны акультура аминистр иабжьгаҩ Милана Бжьаниа ТАСС ахь иҟалҵаз адыррақәа рыла, зыӡбахә ыҟоу УАЕ раԥхьаӡатәи аҳәаанырцәтәи аҟәша Аԥсны аартра, уи аусура аԥсуа ҵарауаа ҿарацәа радыԥхьалара ауп аиҳарак изызкхо. 

«Сгәы иаанагоит ҳара ҳаԥхьаҟа зымҽхак ҭбаау аусура ҳзыԥшуп, избан акәзар, Аԥсни Урыстәылеи еимаздо ирзеиԥшны ирымоу аҭоурых-культуратә ҭынха ду ауп.  Иақәнаго аусшәҟәқәа (УАЕ аҳәаанырцәтәи аҟәша аԥҵара азы) Аԥсныҟа ҳаныхынҳәлак еиԥшҵәҟьа еиқәҳаршәароуп, хара имгакәа ари акыр аҵак ду змоу, хра злоу апроект аусура иалагароуп. Адунеи аҿы иҟоу аҭагылазаашьеи имҩаԥысуа ахҭысқәеи инарымаданы, аҭоурых афальсификациа анымҩаԥысуа, ҳара хымԥада ҳамчи-ҳалшареи еилаҵаны урыстәылатәи аҵарауааи аҭоурыхҭҵааҩцәеи аус рыцура шьақәҳаргылароуп»,- ҳәа илҳәеит Милана Бжьаниа.  

Аԥсны акультура аминистр иабжьгаҩ лажәақәа рыла, УАЕ аҳәаанырцәтәи аҟәша аартра ашьҭахь, ареспублика аҿы аҭоурыхтә рккарааларҵәара иазку аусура алагоит, аԥснытәи астудентцәа рзанааҭдырра аҩаӡара ашьҭыхразы Урыстәылатәи Афедерациаҟа,   ахәҭакахьала,  Аҭоурых-архивтә Институт, Аҳәынҭқарратә архив ахь идәықәҵалахоит.

Милана Бжьания 1992-1993 шш. Аԥсны жәлар рџьынџьтәылатәи еибашьра аан  Аԥснытәи аҳәынҭқарратә архив хықәкыла, гәҭакыла ишырыблыз азгәалҭеит. Уажәы иқәгаз афондқәа реиҭашьақәыргылареи Урыстәыла афедаралтә архивқәа рҿы аматериалқәа рыԥшаареи ирызку аусура мҩаԥысуеит».

«Акыр ирацәаны аматериалқәа ҳара иҳаԥшаароуп, ацифрантә дыррақәа рныҟәгақәа ирнаҳҵароуп, анаҩс урҭ Аԥсны аҳәынҭқарратә Архив ахь идәықәаҳҵароуп. Иарпбоу аусура аамҭа кьаҿ иалагӡаны алагара азԥхьагәаҭоуп», -ҳәа илҳәеит лара.

УАЕ аԥҵан рашәарамза 20, 2012 шықәса рзы, уи Урыстәылатәи аимпериа аҿы 1866-1917 шықәсқәа рзы иҟаз аурыс Императортә ҭоурыхтә еилазаара аҭоурых аҭҵаара мҩаԥнагоит. Аилазаара аԥҵараан уи ахықәкы хаданы иҟан амилаҭтә ҭоурыхтә арккарааларҵәара.