Аҟәа. Жьҭаарамза 5, 2023 шықәса. Аԥсныпресс.  Жьҭаарамза 8 рзы Бзыԥтәи аипподром аҿы Аԥсны Аҳәынҭқарра Ахада Ихраҿа агара азы аҽырыҩрақәа  мҩаԥысуеит.

Аицлабрақәа мҩаԥгахоит –  1000, 1200, 1600 (2-ҽырыҩрак), 2000, 2400, 3200 метр рҟынӡа инаӡо адистанциақәа рҿы. Аҽырыҩрақәа рнаҩс аҽыбӷаҟазацәа ахәаԥшцәа иддырбараны иҟоуп ҽыла ашьапылампыласреи адротикқәа рыршәреи реиԥш иҟоу аҽыбӷаҟазараспорттә еиндаҭларақәа.

Аҽыбӷаҟазарапорттә ныҳәа алагоит асааҭ 09:00 рзы.

Аҟәа. Жьҭаарамза 5, 2023 шықәса. Аԥсныпресс. Аԥсны Жәлар  Реизара - Апарламент  Аиҳабы Ашәба  Лаша Арҵаҩы имш азы адныҳәалара ҟаиҵеит.

Адныҳәалараҟны иҳәоуп: 

"Акыр иаԥсоу арҵаҩцәа! Аԥсны Жәлар  Реизара - Апарламент ахьӡала ишәыдысныҳәалоит шәзанааҭтә ныҳәа - Арҵаҩы имш!

Ахәыҷра ашықәсқәа раан ауаҩы иоуа адыррақәа аҵак ду рымоуп. Убри аҟнытә ҳара ҳзы арҵаҩы иџьабаа ахә дууп. Арҵаҩы изанааҭтәи иуаҩытәҩсатәи ҟазшьақәа ҳтәыла уаҵәтәи амш ашьақәгылараҟны ирыӡбо рацәоуп.

Аҟәа. Жьҭаарамза 05, 2023 шықәса. Аԥсныпресс. Аԥсны Аҳәынҭқарра Ахада  Аԥсны арҵаҩцәа рзанааҭтә ныҳәа рыдиныҳәалеит.

Ҳаҭыр зқәу арҵаҩцәа!

Гәык-ԥсык ала ишәыдысныҳәалоит шәзаанаҭтә ныҳәа. Арҵаҩы имш - зеиӷьыҟам мшуп арҵаҩцәа рџьабаа агәаларшәаразы.

Шәзанааҭ аҵакы, шәхы-шәыԥсы шәамеигӡакәа имҩаԥыжәго шәусура ахә ашьара уадаҩуп. Шәара шәҵаҩцәа ирышәҭо адыррақәа рнаҩс, иреиҳау аҩаӡарахь амҩа ианышәҵоит. Шәара ишәыбзоураны аӡәырҩы аԥсҭазаараҿы рхатә ҭыԥ алырхуеит, ихьӡырҳәаганы иҟалоит дасу иалырхуа рзанааҭқәа рыҟны. Шәара аҿар реиҵааӡараҿы, адыррақәа рыҭараҿы, абиԥара ҿыцқәа рышьақәнылараҿы, Аԥсны аԥеиԥш бзиа ачаԥараҟны ишәылшо рацәоуп.

Аҟәа. Жьҭаарамза 3, 2023 шықәса. Аԥсныпресс. Аҩаша, жьҭаарамза 3 рзы, Аҟәа ақалақь, Владислав Арӡынба ихьӡ зху Арратә Ахьӡ-Аԥша амузеи аҟны иаатит  1992-1993 шш. Аԥсны жәлар Рџьынџьтәылатәи еибашьра аҿы Аиааира агара Амш  30-шықәса ахыҵреи Аԥсны аҳәынҭқарратә хьыԥшымра жәларбжьаратәи азхаҵара ҟалеижьҭеи 15-шықәса аҵреи иазкны Жәларбжьаратәи анаукатә конференциа «Амшынеиқәа-кавказтәи арегион аҭоурыхи ҳаамҭазтәи аамҭеи рыпроблемақәа» аусура иалагеит.  

Аусмҩаԥгатә аиҿкааҩцәа –  Аԥсны Анаукақәа Ракадемиа иатәу Д.Гәлиа ихьӡ зху Аԥснытәи агуманитартә ҭҵаарақәа Ринститут, Аԥснытәи аҳәынҭқарратә Университет, Аџьынџьуаа рырхынҳәразы аҳәынҭқарратә Еилакы.

Аконференциа аартуа, Аԥсуаҭҵааратә Институт адиректор Арда Ашәба еизаз зегьы 1992-1993 шш. Аԥсны жәлар Рџьынџьтәылатәи еибашьра аҿы Аиааира агара Амш  30-шықәса аҵреи Аԥсны аҳәынҭқарратә хьыԥшымра жәларбжьаратәи азхаҵара 15-шықәса ахыҵреи  рыдиныҳәалеит. 

Арда Ашәба Аԥсны аҭоурых аҿы иналукааша арыцхәқәа ирызкны жәларбжьаратәи аконференциақәа рымҩаԥгара акыр ҵуеит хра злоу традицианы ишьақәгылеижьҭеи ҳәа иазгәеиҭеит.

«Ас еиԥш иҟоу анаукатә форумқәа ирыбзоураны ҳара аиҩызаратә атмосфера аҿы ҳгәаанагарақәа реибыҳәареи аиҿцәажәареи рзы алшара ҳауеит. Арҭ аусмҩаԥгатәқәа Аԥсны, иааизакны Кавказ аҭоурых аспектқәа рацәаны раарԥшразы алшара аԥырҵоит», – ҳәа иҳәеит Арда Ашәба.

Аҳәынҭқарра Ахада ихьӡала адныҳәаларатә цҳамҭа даԥхьеит Аҳәынҭқарра Ахада Иусбарҭа анапхгаҩы Абесалом Кәарҷиа.

«Ари аконференциа 1992-1993 шш. Аԥсны жәлар Рџьынџьтәылатәи еибашьра аҿы Аиааира  Амш 30-шықәса ахыҵреи Ареспублика Аԥсны аҳәынҭқарратә хьыԥшымра Жәларбжьаратәи азхаҵара ҟалеижьҭеи 15-шықәса аҵреи иахьазку, уи иамоу аҵак ду арҵабыргуеит.

Зегьы раԥхьаӡа иргыланы иазгәаҭатәуп аконференциа алахәылацәа реилазаара. Уи еиднакылеит еицырдыруа аҵарауаа, аҭҵаарадырыҩцәа, аекспертцәа, апрофессор-рҵаҩратә еилазаара ахаҭарнакцәа. Даара игәылҭәаау амшхәаԥштә, аконференциа алахәылацәа рԥышәеи рыхьӡ-рыԥшеи ҳасаб азуны аконференциа ауаажәларратә усхкы ала Аԥсны имҩаԥысуа акыр зҵазкуа анаукатә усмҩаԥгатәқәа иреиуоуп ҳәа уҳәар алшоит», - ҳәа иазгәаҭоуп Аҳәынҭқарра Ахада иҟаиҵаз адныҳәаларатә цҳамҭа аҿы.

Аслан Бжьаниа аконференциа иалаху зегьы ақәҿиарақәа рзеиӷьаишьеит.

Аконференциа амшхәаԥштә иалагалоуп аполитикатә ҭоурых иадҳәалоу актуалтә зҵаарақәа, акультура, арегионалтә усеицура, Аԥсни Амшынеиқәа-Кавказтәи арегиони  ҳаамҭазтәи аамҭазы еиԥш ажәытәӡатәи аамҭеи абжьарашәышықәсатәи аамҭақәа рзы аҿиара иадҳәалоу актуалра злоу азҵаарақәа.

Аконференциа апроблематика аҿы иҷыдоу аҭыԥ ааннакылоит 1992-1993 шш. Аԥсны жәлар Рџьынџьтәылатәи еибашьра аҿы Аиааира агара аҿы хатәгәаԥхарала еибашьуази аԥсуа диаспори рлагала атема. 

Аҟәа. Жьҭаарамза 4, 2023 шықәса. Аԥсныпресс. Аҟәа ақалақьтә Еизара адепутатцәа 2023 шықәсазы аҳҭнықалақь абиуџьеҭ аиҭакрақәа аларгалеит, ҳәа адырра ҟанаҵоит Аҟәа ақалақь Ахадара аофициалтә саит.  

Аиҭакрақәа Наӡаӡе амҩала игылоу амашәыр  зхылҿиаар ауа аҩны №3  аҿы инхоз ауааԥсыра ахарҭәааратә шәатәқәа рызшәаразы ареспубликатә биуџьет аҟынтәи 50 млн. мааҭ рҟынӡа абиуџьетбжьаратәи атрансфер алагалара иадҳәалахеит.    

6 миллион мааҭ 1992 – 1993 шш. Аԥсны жәлар Рџьынџьтәылатәи еибашьраҿы Аиааира агара Амш 30-шықәса ахыҵра инамаданы аинвалидцәеи иҭахаз рҭаацәарақәеи аԥаратә цхыраагӡатәқәа рызшәара ахь идәықәҵахоит.  

Аҟәа. Жьҭаарамза 4, 2023 шықәса. Аԥсныпресс. Новороссисктәи аҳазылхыҩцәа Аԥснынтәи Урыстәылаҟа амашьынақәа ралагалараан аҳазылхратә шәатәқәа ршәара аҽахгара иадҳәалоу афактқәа аадырԥшит.

Убас, 2023 шықәса алагара инаркны Новороссисктәи аҳазылхра  хазхаҭалатәи ахаҿқәа рыла Евразиатәи Аекономикатә Еидгылара аҳазылхратә ҵакыра ахь аҳәаанырцәтәи атранспорттә хархәагақәа ралагалараан зеицҵалаҵ  ҳараку аҳазылхратә шәатәқәа ршәара  аҽахгара иадҳәалоу афактқәа рыла Урыстәылатәи Афедерациа Аусеилыргаратә Закәанеидкыла ахәҭаҷ 194, ахәҭа 1 инақәыршәаны аусеилыргарақәа хԥа хацдыркит, ҳәа адырра ҟанаҵоит Урыстәылатәи Афедерациа Афедералтә ҳазылхратә Маҵзура аофициалтә саит.

Аҟәа. Жьҭаарамза 4, 2023 шықәса. Аԥсныпресс. Ҭамаз Ҭарба жьҭаарамза 7 рзы Аҟәатәи  астадион «Динамо» аҿы имҩаԥысраны иҟоу наҟ-ааҟ ҩыџьа реиндаҭлара «Mixed Martial Arts» асериа азы 73-тәи атурнир ихы алаирхәраны дыҟоуп, - ҳәа адырра ҟанаҵоит аҿари аспорти русқәа рзы Аҳәынҭқарратә Еилакы аофициалтә саит.

Аԥснытәи аспортсмен диндаҭлоит Ҭемыр Тургат. Ҭамаз Ҭарба наҟ-ааҟ ҩыџьа реиндаҭлара «Mixed Martial Arts» асериа азы апрофессионалтә еиндаҭларақәа ҩынтә ихы алаирхәхеит.

Аҟәа. Жьҭаарамза 4, 2023 шықәса. Аԥсныпресс. Араиоқәа рхадарақәа аҵара аҟәшақәа алархәны Аԥсны аҩныҵҟатәи аусқәа Рминистрра ауаажәларратә шәарҭадара Аусбарҭала еиҿкаау амҩаҿы аныҟәара ашәарҭадара иазку акциа мҩаԥысит Гәылрыԥшь араион аҿы, ҳәа адырра ҟанаҵоит Аԥсны аҩныҵҟатәи аусқәа Рминистрра апресс-маҵзура.   

Аҟәа. Жьҭаарамза 4, 2023 шықәса. Аԥсныпресс. Амҵәышәмпылтә команда «Спартак» Славианск-на-Кубани ақалақь аҿы имҩаԥысуаз иаарту атурнир «Ахьтәы ҭагалан» аҿы актәи аҭыԥ ааннакылеит, ҳәа адырра ҟанаҵоит аҿари аспорти русқәа рзы Аҳәынҭқарратә Еилакы.  

Атурнир аҿы 2012 шықәсазы иизи урҭ иреиҵбууи аҭыԥҳацәа рыбжьара аицлабрақәа рхы аладырхәит ԥшь-командак: «Ростов», «Ростов-2», «Славянск-на-Кубани», «Спартак».

Аҟәа. Жьҭаарамза 4, 2023 шықәса. Аԥсныпресс. Аҟәа ақалақьтә Еизара адепутатцәа цәыббрамза 27, 1993 шықәсазы ақырҭуа снаипер ила иҭархаз Аԥсны Афырхаҵа, ИТАР-ТАСС афотокорреспондент Андреи Соловиов (07.10.1953 - 27.09.1993) игәалашәара анаунагӡатәра  азы аӡбамҭа рыдыркылеит. Аԥсны Афырхаҵа игәалашәара азы амемориалтә ӷәы шьақәдыргылоит иара дахьҭахаз аҭыԥ азааигәара – Владимир Аршба ихьӡ зху амҩала игылоу аҩны N53 аҿратә ган аҿы.

Андреи Соловиов ихьӡ анаунагӡатәразы аинициатива аазырԥшыз Аԥсны ажурналистцәа Реидгыла ауп.

1992 – 1993 шш. Аԥсны жәлар Рџьынџьтәылатәи еибашьраан Андреи Соловиов изныкымкәа Аԥсныҟа даахьан. Иара иҭихыз аибашьра иазку акадрқәа  Аԥсны иззымдыруа, изымбац шамахамзар аӡәгьы дыҟамзар ҟалап. Иара иҭихыз афотосахьақәа рӷьырак Аԥсны Аиааиреи Ахьыԥшымреи Рымш 30-шықәса ахыҵра иазку абаннерқәа ирнуп.