Аҟәа. Абҵарамза 2, 2022 шықәса. Аԥсныпресс. Абҵарамза 2 – 5 рзы, Аҟәа ақалақь аҿы Аԥсны Аҭҵаарадыррақәа  Ракадемиа  25-шықәса ахыҵра иазкны аныҳәатә усмҩаԥгатәқәа мҩаԥысуеит, ҳәа иаанацҳауеит Аҭҵаарадыррақәа Ракадемиа апресс-маҵзура. Аԥснытәи аҳәынҭқарра иҿыцӡоу аҭоурых аҿы ари акыр зҵазкуа ахҭыс Ареспублика анаукатә еилазаара рыцазгәаҭара азы Аԥсныҟа иааит жәаҩыла асасцәа. 

Абҵарамза 2 рзы аиубилеитә усмҩаԥгатәқәа хацзыркуа усмҩаԥгатәны иҟалоит Аԥсны аҵарауаа ҿарацәеи аспирантцәеи рнаукатә конференциа.

«Ҩажәи хәба шықәса рыла Аԥсны еиҵагылеит аԥсабарадырреи агуманитартә ҭҵаареи рхырхарҭала иҿыцу аҵарауаа рабиԥара. Аԥсны анаукатә усзуҩ ҿарацәа иҿыцу адыррақәеи аԥышәеи рыла Аԥснытәи агуманитартә ҭҵаарақәа Ринститут, Аботаникатә Институт, Аексперименталтә патологиеи атерапиеи Ринститут, Аҟәатәи афизика-техникатә Институт, Ақыҭанхамҩатә Институт, Аԥсны Аҭҵаарадыррақәа Ракадемиа аекологиа Аинститут аилазаара иалалаз Агидрофизикатә Институт, уҳәа рҿы еиқәырханы иаанхаз анаукатә школқәа хәызмаӡам аԥышәа дырбеиоит, идырҭбаауеит.   Аҭҵааҩцәа ҿарацәа рыцхырааразы ицәырҵит ҳаамҭа иақәшәо атехнологиақәа.

Аԥсны Аҭҵаарадыррақәа Ракадемиа асистема иаҵанакуа анаукатә усбарҭақәа афинанстәра акыр ишхьысҳазгьы, Аҭҵаарадыррақәа Ракадемиа апрезидиум, Академиа акадрқәа разыҟаҵареи аспирантуреи рыҟәша шәҩыла аҟыбаҩ злоу аҿар аҵак ду змоу аусурахь радыԥхьалареи разыҟаҵареи алшеит», - ҳәа иазгәаҭоуп Аԥсны Аҭҵаарадыррақәа Ракадемиа апресс-релиз аҿы.

Аҟәа. Абҵарамза 2, 2022 шықәса. Аԥсныпресс. «Амшынеиқәафымцамч» Аԥсны ахәҭак аҿы афымцамч ала аиқәаршәара аганахьала асааҭ 10:00 инаркны 15:00 рҟынӡа аԥкрақәа аланагалеит. Уи зыдҳәалоу звольтҳараку афымцацәаҳәа «Аҽгәара» аҿы имҩаԥысуа аиҭашьақәыргыларатә усурақәеи Урыстәылантәи афымцамч аашьҭра аганахьала ишьақәгылаз адефицити роуп, ҳәа иаанацҳауеит «Амшынеиқәафымцамч» апресс-маҵзура.

Аҟәа. Абҵарамза 1, 2022 шықәса. Аԥсныпресс. Пицундатәи аорӷан 47-шықәса ахыҵит. 47- шықәса раԥхьа, абҵарамза 1, 1975 шықәса рзы Аԥсны акультуратәи амузыкатәи аԥсҭазаара аҿы аҭоурыхтә хҭыс ду ҟалеит – Пицунда ақалақь аҿы зқьы шықәса зхыҵуаз аныхабаа аҿы аорӷан шьақәыргылахеит. Аорӷан аҟаҵареи ашьақәыргылареи ирыдҳәалоу аусурақәа нанагӡон   Аилазаара «Алеқсандр Шуке»- иарбоу амузыкатә инструментқәа рҭыжьразы  Германиа иреиӷьу афирмақәа иреиуоу.   47-шықәса раԥхьа адунеи амузыкатә хсаала аҿы аорӷан ахьышьақәыргылоу иҿыцу даҽа концерттә залк цәырҵит. Абар шьҭа ажәашықәсақәа инеиԥынкыланы ари зеиӷьаҟам, ҳреспублика иагәадуроу аинструмент аҭыԥангьы амузыка абзиабаҩцәа реиԥш, хыԥхьаӡара рацәала Аԥсны иаҭаахо асасцәагьы ргәалаҟазаара шьҭнахуеит.

Ари ижәытәӡатәиу аԥснытәи аныхабаа аҿы  ишьақәыргылоу, зеиԥшыҟам акустика змоу амузыкатә инструментқәа раҳ иахылҵуа ауникалтә бжьы ахьӡ-аԥша ҳтәыла анҭыҵ инаҩхьеит. Аԥсны еиԥш Пицундатәи аорӷангьы акыр ауадаҩрақәа ирхысит, акырынтә «аԥсра иацәынхахьаз»,  аха уеизгьы, иааиԥмырҟьаӡакәа  гәцакарала иаиуо ахшыҩзышьҭреи, иуадаҩу аиҭашьақәыргыларатә усурақәа рымҩаԥгареи ирыбзоураны, иахьа уажәраанӡагьы ари аныхабаа ианыҩуеит  утәызтәуа, иршанхагоу уи абжьы.  

Аҟәа. Абҵарамза 1, 2022 шықәса. Аԥсныпресс. Аԥсны Жәлар Реизара – Апарламент Аиҳабы Лаша Ашәба Аԥсны усуратә визитла иаҭааз Беларусиеи Урыстәылеи Реидгыла Апарламенттә Еизара аделегациа даԥылеит.

Беларусиеи Урыстәылеи Реидгыла Апарламенттә Еизара хаҭарнакра азыруан: Аҿартә политикеи, аспорти, атуризми рзы Апарламенттә Еизара Акомиссиа ахантәаҩы Артиом Туров, Акомиссиа ахантәаҩы ихаҭыԥуаҩ Сергеи Клишевич, апарламенттә Комиссиа алахәцәа Дмитри Басков, Ольга Петрашова, Антон Ткачиов, Беларуси Урыстәылеи Реидгыла Апарламенттә Еизара Аҭакзыԥхықәу амаӡаныҟәгаҩ Сергеи Стрельченко, Аҭакзыԥхықәу амаӡаныҟәгаҩ ихаҭыԥуаҩцәа Вадим Иванеци Дмитри Гоборов, Апарламенттә Еизара Амаӡаныҟәгарҭа аусбарҭақәа реиҳабацәа Дмитри Гриазнови Андреии Шахорскии, иара убас амаӡныҟәгарҭа аусзуҩцәа Виачеслав Русецкии Антон Белокопытови.

Аиԥылара иара убас иалахәын Аԥсны Жәлар Реизара – Апарламент Аиҳабы ихаҭыԥуаҩ Ашот Миносиани Аԥсны Жәлар Реизара – Апарламент Аппарат Анапхгаҩы Вадим Бжьаниа.

Аҟәа. Абҵарамза 1, 2022 шықәса. Аԥсныпресс.  Аԥсны аԥыза-министр актәи ихаҭыԥуаҩ, ақыҭанхамҩа аминистр Беслан Џьопуа Аԥсны аминистрцәа Реилазаареи Ареспублиа Ҟрым (Урыстәылатәи Афедерациа) аминистрцәа  Рхеилаки рыбжьара ахәаахәҭра-економикатә, анаука-техникатә, агуманитартә усеицура азы Анапхгарабжьаратәи акомиссиа аԥсуа ган аилатәара мҩаԥигеит. 

Аиԥылара иалахәыз Аҟәа ақалақь аҿы, Анапхгарабжьаратәи акомиссиа ахԥатәи аилатәара аҿы знапаҵыҩра мҩаԥгаз аусмҩаԥгатәқәа рыплан анагӡара амҩаԥысшьа иалацәажәеит.

Аҟәа. Абҵарамза 1, 2022 шықәса. Аԥсныпресс. Жьҭаарамза  27, 2022 шықәса рзы Аҟәа араион апрокуратура Акаба Владимир Игор-иԥа иганахьала Аԥсны Ашьусеилыргаратә Закәанеидкыла ахәҭаҷ  99, ахәҭа 1 иазԥхьагәанаҭо ацәгьоура, Малыиа Алхас Зураб-иԥа гәҭакыла ишьра инамаданы ашьаустә усеилыргара хацнаркит.

Аԥсны апрокуратура Хада асаит аҿы иҟоу адыррақәа рыла, жьҭаарамза 26, 2022 шықәса, асааҭ  19:00 инарзынаԥшуа, Акаба Владимир Игор-иԥа иҩны, (Аҟәа араион, Ӡгәыҭа ақыҭа, Альпискаиа амҩа, аҩны № д.73 «А»)  аишәачара аан, макьаназы ишьақәыргылам ахкы змоу иҭҟьо амцабџьар ала гәҭакыла Малыиа Алхас Зураб-иԥа ихәдаџьад ахьыҟаз ала диеихсит.

Аҟәа. Абҵарамза 1, 2022 шықәса. Аԥсныпресс. Аҳәынҭқарра Ахада Аслан Бжьаниа иҟаиҵаз анапынҵақәа рыла аԥыза-министр Алеқсандр Анқәаб аԥыза-министр ихаҭыԥуаҩ Сергеи Пустовалов, шьаҭанкылатәи аргылара азы Аусбарҭа анапхгаҩы Ҭемыр Агрба, атәылахьчара аминистр ихаҭыԥуаҩ Лизберт Порцхол-оглы алархәны, атәылахьчаралшара арӷәӷәара иазку аусмҩаԥгатәқәа рынагӡара иадҳәалоу азҵаарақәа рылацәажәара мҩаԥигеит. Абри атәы анацҳауеит аминистрцәа Реилазаара апресс-маҵзура.

Аҟәа. Абҵарамза 1, 2022 шықәса. Аԥсныпресс. Урыстәыла аԥыза-министр ихаҭыԥуаҩ Алеқсандр Новак аԥыза-министр ихаҭыԥуаҩ Мараҭ Хуснуллин имыцхәрас Аԥсни Аахыҵ Уаԥстәылеи аус рыцура азы анапхгарабжьаратәи акомиссиа ацхантәаҩыс дҟаҵоуп.

Аҟәа. Абҵарамза 1, 2022 шықәса. Аԥсныпресс. Аԥсны аԥыза-министр ихаҭыԥуаҩ Сергеи Пустовалов ахықәкытә программа «Анхарҭаҭыԥ– 2022» азы анапхгарабжьаратәи анагӡара-напхгараҭатә комиссиа ҳазҭоу ашықәс азы аихшьаалатә усуратә еилатәара мҩаԥигеит.  

2022 шықәсазы ахықәкытә Программа «Анхарҭаҭыԥ – 2022» аҳәаақәа ирҭагӡаны анхарҭа аахәара азы аҳәынҭқарра аҟынтәи афинанстә цхыраара аиуразы ауааԥсыра рҟынтәи иалагалаз 94 зыҳәамҭа  иахәаԥшит.  

Иааизакны уахәаԥшуазар, 2022 шықәсазы ақәшаҳаҭра аиуит 51 зыҳәамҭа:

I агәыԥ иаҵанакуа аинвалидцәа, 1992-1993шш. Аԥсны жәлар рџьынџьтәылатәи еибашьра  I агәыԥ иаҵанакуа аинвалидцәагьы уахь иналаҵаны. – 14 зыҳәамҭа;

Ахәыҷы ныҟәгатәыс дызмоу ахаҿқәа:

Аҟәа. Абҵарамза 1, 2022 шықәса. Аԥсныпресс.  Аԥсны Аҳәынҭқарра Ахада Аслан Бжьаниа Аҿартә политикеи, аспорти, атуризми рзы Акомиссиа ахантәаҩы Артиом Туров напхгара зиҭоз Беларусиеи Урыстәылеи Реидгыла Апарламенттә Еизара   аделегациа даԥылеит.

Асасцәа аԥсшәа раҳәо, Аҳәынҭқарра Ахада иазгәеиҭеит  еиуеиԥшым аҳәынҭқарратә усбарҭақәа рзакәанԥҵаратә, мамзаргьы анагӡаратә мчхараҟны аизыҟазаашьақәа рырҭбаара шаҭаху.

«Еиуеиԥшым аҩаӡарақәа рыҟны ҳара ҳаимадарақәа рыцҵара ҳажәлар, ҳуааԥсыра ирыдҳәалоу, ииашоу ахырхарҭа рызҭогьы акәны иҟазароуп. Еснагь ус иҟан, убри аҟынтә сара агәахәа бзиала шәаабеит ҳәа шәасҳәоит зегьы ҳзы иуадаҩу аамҭазы», - ҳәк иҳәеит Аслан Бжьаниа.

 Аҳәынҭқарра Ахада иҳәеит ас еиԥш иҟоу аиԥыларақәа рыҟны Аԥсни, Урыстәылеи, Беларусиеи рыжәларқәа ирыбжьоу аиҩызара шарӷәӷәо. «Ҳарҭ акрааҵуеит ҳаибадыруеижьҭеи, ҳаизааигәахеижьҭеи", - ҳәа иҳәеит Аҳәынҭқарра Ахада.

Аслан Бжьаниа асасцәа ирзеиҭеиҳәеит ихәыҷра иадҳәалаз ҭоурыхк.

«Сара сқыҭа гәакьаҿы Тамшь апионертә лагер ыҟан, уа Беларусынтә ахәыҷқәа рыԥсы ршьон. Сара сшыхәыҷыз убри алагер ахь сдәықәырҵеит, аурыс бызшәа сҵарц азы. Аҵыхәтәаны, саныхынҳә  излеилкаахаз ала, аурыс бызшәа акәымкәа, абеларус бызшәоуп исҵаз. Иазгәаҭатәуп, апионертә лагер ыҟанаҵы ҳқыҭаҿы еилаԥсаз 17 ҭаацәара шыҟаз. Ари ҭоурых бзиоуп", - ҳәа иҳәеит Аҳәынҭқарра Ахада.

Апарламенттә еизара аҿартә политикеи, аспорти,  атуризми ркомиссиа ахантәаҩы, Ихьыԥшым Аҳәынҭқаррақәа Реиҩызара аусқәеи, евразиатәи аинтеграциеи  ҳџьынџьуааи ҳареи  ҳаимадареи русқәа рзы Аҳәынҭқарратә Дума Аилак ахантәаҩы ихаҭыԥуаҩ Артиом Туров Аҳәынҭқарра Ахада иҭабуп ҳәа еиҳәеит  иҟаиҵаз адкыларазы.

«Ара сыҟазаара гәахәароуп сара сзы. Иҭабуп ҳәа сҳәарц сҭахуп аконструктивтә ҟазшьа змаз Апарламент Аиҳаби ҳареи ҳаиҿцәажәаразы. Ҳколлегацәа-адепутатцәеи ҳареи Урыстәылеи Беларуси реиԥш, Аԥсны аинтересқәагьы ирыдҳәалоу ахырхарҭақәа жәпакы ҳрылацәажәеит. Ҳарҭ инарҭабааны аимадарақәа ҳабжьаҳҵароуп агәуманитартә, аекономикатә, аполитикатә усхкқәа рыҟны, агәра згоит, ҳажәлар рҿаԥхьа иқәгылоу ашәарҭарақәа рықәҿыҭра шҳалшо. Ҳарҭ ҳажәларқәа шәышықәсала аидгылара рыман, иреиӷьу аҵасқәеи, акультуреи, адини ҳаидыркылоит. Ас еиԥш иҟоу аформат ала раԥхьаӡа акәны Аԥсны ҳаҟоуп, иҭабуп ҳәа шәаҳҳәоит аамҭа ԥшааны ҳаибабара ахьалшәыршаз»,- ҳәа иҳәеит Артиом Туров.

Аслан Бжьаниа иазгәеиҭеит Аԥсни Беларуссиеи рыбжьара аекономикатә еизыҟазаашьақәа рыҿиара  иамоу аҵакы. «Ҳара аекономикатә ҿиара  аҵак ду амоуп ҳәа иҳаԥхьаӡоит. Ааигәа Аԥсны даҳҭан Беларусиа Ахада, иазгәаҳҭаз шьаҿақәак ыҟоуп, аԥхьаҟа иҵегьы ирыцҵахоит. Ҳарҭ  иаҳҭахуп ҭынч анхара-анҵыра, аҿиара. Ҳарҭ зегьы ҳаҭырла ҳарзыҟоуп, ҳахгьы ҳаҭыр ақәаҳҵоит",- ҳәа иҳәеит иара.