Аҟәа. Ԥхынгәымза 30, 2024 шықәса. Аԥсныпресс. 2024 шықәса I азыбжа азы апрокурор-усеилыргаратә усзуҩцәа рхыԥхьаӡара 203-ҩык рҟынӡа инаӡеит.

50 шықәса иреиҳабу – 22-ҩык, 40 шықәса инаркны 50 шықәса рҟынӡа зхыҵуа – 40-ҩык, 30 шықәса инаркны 40 шықәса рҟынӡа зхыҵуа  – 45-ҩык, 30 шықәса зхымҵыц – 27- ҩык.

Аџьашықәс ала апрокурор-усеилыргара аусзуҩцәа реилазаара абасала ишьақәгылоуп: 3 шықәса рҟынӡа  – аӡәы, 5 шықәса рҟынӡа – 13-ҩык, 10-шықәса рҟынӡа  – 27-ҩык, 15 – шықәса рҟынӡа- 33-ҩык, 20-шықәса рҟынӡа – 22-ҩык, 20 шықәса инаркны  уи еиҳангьы – 42 - ҩык.

Аҟәа. Ԥхынҷкәынмза 30, 2024 шықәса. Аԥсныпресс.  2024 шықәса актәи азыбжазы апрокурорцәа алархәны имҩаԥгаз аӡбарҭа аилатәарақәа рҿы 184 ашьаусеиларгарақәа ирыхәаԥшит. Уи 67 шьаус рыла еиҵоуп иҳаҩсыз  2023 шықәса аиԥш-зеиԥшу аамҭахәҭа азы аасҭа, ҳәа 2024 шықәса актәи азыбжа азы апрокуратура аусбарҭақәа русура аихшьаалақәа рыҟаҵара иазкны имҩаԥысыз апрокуратура Хада аколлегиа аилатәара аҿы дықәгыло адырра ҟаиҵеит Апрокуратура Хада Аӡбаратә Усбарҭа аиҳабы, атәыла апрокурор Хада актәи ихаҭыԥуаҩ инапынҵақәа назыгӡо Даур Амҷба.

Изхәаԥшыз 184 шьаус рҟынтәи   163 зыӡбеи 21 қәҵареи рыдыркылеит.

2024 шықәса актәи азыбжазы зус рыӡбаз рзеиԥш хыԥхьаӡара  192-ҩык рҟынӡа инаӡоит (2023 шықәса аиԥш-зеиԥшу аамҭахәҭа азы – 250-ҩык). Ҭакрала ахьырхәра иақәыршәоуп 75-ҩык,  117-ҩык абаандаҩра иадҳәалам ахьырхәрақәа ирықәыршәоуп. Убас ала:

– 92-ҩык ҭакрадатәи азгәаҭаралатәи аусӡбара иақәыршәоуп,

– 25 –ҩык ахараԥса дыршәоуп.

9 шьауск аганқәа реинрааларала иаанкылоуп.

Амедицинатә ҟазшьа змоу ауснагӡатәқәа иадцаланы иахыгоуп 7-ҩык.  

Аӡәы ашьауск ала дыриашоуп.

2024 шықәса актәи азыбжазы ашьаустә ҭакԥхықәра иақәыршәахеит 6-ҩык аҳәсеи зықәра наӡам аӡәи.  Урҭ рахьынтә ԥшьҩык уажәаԥхьагьы ашьаустә ҭакԥхықәра иақәыршәахьан.  

«2024 шықәса актәи азыбжазы иахәаԥшыз ашьаусқәа ранализ ашьаусқәа реиҳарак изакәанымкәа анаркотикатә маҭәашьарқәа реикәыршара ишадҳәалоу аанарԥшит. Урҭ рхыԥхьаӡара – 93 рҟынӡа инаӡоит», – ҳәа инаҵшьны иазгәеиҭеит Даур Амҷба.

21 шьаус иахәаԥшын анаркотикатә маҭәашьарқәа рыларҵәара (рыҭира) иадҳәаланы, 7 шьауск  7-ҩык рганахьала  анаркотикатә маҭәашьар «прегабалин», иара убас егьырҭ арҩышьыгатә маҭәашьарқәа аҳәынҭқарратә ҳәаа рахгара инамаданы ихацыркын.   

Анаҩс аҭира хықәкыс иҟамҵаӡакәа анаркотикатә маҭәашьарқәа изакәанымкәа рыҵәахра аганахьала иахәаԥшын 60 шьаус, урҭ рыла 59-ҩык рус рыӡбеит. Аӡәы иганахьала амнистиа ахархәара инамаданы ашьаусеилыргара аанкылоуп. Хәҩык иреалу аҽҳәара змоу ахьырхәрақәа ирықәыршәахеит.

Арҩышьыгатә маҭәашьар злоу аҵиаақәа изакәанымкәа рыларҵәара азы хҩык ауаа рганахьала ихацыркыз ашьаусеилыргарақәа хәба ирыхәаԥшит, зегьы иреалу аҽҳәарақәа змоу ахьырхәрақәа иақәдыршәеит.

«Аӡбарҭақәа рыла зыкапан дуу анаркотикатә маҭәашьарқәа рыҭира азы зус рыӡбо рганахьала Аԥсны Аҳәынҭқарра Ашьаустә Закәанеидкыла ахәҭаҷқәа 56, 57 иазԥхьагәарҭо аҷыдалкаатә, аус зырмарио аҭагылазаашьа ахархәара атенденциа  ӷәӷәала агәҭынчымра цәырнагоит. Аӡбарҭақәа игәҩароу ахаҿқәа аусеилыргара алагамҭазы амилициа аусзуҩцәа дара уаанӡа иҟарҵахьаз анаркотикатә маҭәашьарқәа зҭаҵәахыз имаӡоу аҭыԥқәа ддырбоит, иара убри ала  рхымҩаԥгашьала активла ацәгьоурақәа реилыргара иацхраауеит ҳәа иԥхьаӡаны, анаҩс аӡбарҭа Аԥсны Ашьаустә Закәанԥҵара ахәҭаҷ  57 ахархәареи азакәан ишьақәнаргыло ҵаҟатәи аҩаӡара аҵкьыс хынтә еиҵаны ахьырхәра рзалхреи рзы азин рынаҭоит.  Ас еиԥш иҟоу аӡбамҭақәа актәи, акассациатә, ахылаԥшратә инстанциақәа рыӡбарҭақәа рҿы жәабала аҭыԥ рымоуп», - ҳәа инаҵшьны иазгәеиҭеит Даур Амҷба.  

Аҟәа. Ԥхынгәымза 30, 2024 шықәса. Аԥсныпресс. Апрокуратура аусбарҭақәа рыла 2024 шықәса  I азыбжа азы 101 Аԥсны азакәанԥҵара аилагарақәа аарԥшын (2023 шықәса аиԥш-зеиԥшу аамҭахәҭа азы -153).

Иаарԥшыз аилагарақәа рырҽеира азы 46 азԥхьанагарақәа алагалан. Урҭ рыхәаԥшра аихшьаалақәа рыла 4-ҩык алеишәатә ҭакԥхықәра иақәыршәахеит, Иалагалоуп   ақәшаҳаҭымхарақәа-16, 14-ҩык административтә ҭакқхықәра иақәыршәоуп,  29-ҩык азакәанԥҵара аилагара аԥхьырҟәҟәаара аганахьала агәҽанызаара рыҭоуп. Абри азы 2024 шықәса актәи азыбжа азы апрокуратура аусбарҭақәа русура аихшьаалақәа рыҟаҵара иазкны имҩаԥысыз апрокуратура Хада аколлегиа аилатәара аҿы дықәгыло адырра ҟаиҵеит Апрокуратура Хада Аӡбаратә Усбарҭа аиҳабы, атәыла апрокурор Хада актәи ихаҭыԥуаҩ инапынҵақәа назыгӡо Даур Амҷба.

Аҟәа. Ԥхынгәымза 30, 2024 шықәса. Аԥсныпресс. 2024-тәи ашықәс 6 мыз ирылагӡаны изакәанымкәа анаркотикатә маҭәашьар аикәыршареи зеиҭаҳара ҟамло арҩышьыгатә маҭәашьар злоу аҵиаақәа  раарыхреи иадҳәалоу 93 цәгьоура  ашәҟәы иҭагалоуп.  Уи ашәҟәы иҭагалаз ацәгьоурақәа рзеиԥш хыԥхьаӡара аҟынтәи 32.7% рҟынӡа инаӡоит, ҳәа 2024 шықәса актәи азыбжа азы апрокуратура аусбарҭақәа русура аихшьаалақәа рыҟаҵара иазкны имҩаԥысыз апрокуратура Хада аколлегиа аилатәара аҿы дықәгыло адырра ҟаиҵеит атәыла апрокурор Хада актәи ихаҭыԥуаҩ инапынҵақәа назыгӡо Даур Амҷба.  

«Аҩныҵҟатәи аусқәа русбарҭақәа рыла, уаанӡа еиԥш уажәгьы аиҳарак анаркотикатәи арҩышьыгатәи амаҭәашьарқәа анаҩс аҭира хақәкыс иҟамҵаӡакәа изакәанымкәа реикәыршара иадҳәалоу афактқәа аарԥшхоит. Ашьауӷатә ҭакԥхықәра иақәыршәахоит аиҳарак анаркотикатә маҭәашьарқәа здызкыло, ахәышәтәра зҭаху атәылауаа. Иарбоу акатегориа ала ишьақәыргылаз ацәгьоурақәа рзеиԥш хыԥхьаӡара аҟынтәи анаҩс аҭира хықәкыс иҟаҵаны анаркотикатә маҭәашьарқәа изакәанымкәа реикәыршара азы ихацыркуп 18 ашаьусеилыргара (19,3%). Иаарԥшын зыкапан дуу анаркотикатә маҭәашьарқәа рпатртиақәа, иаанкылан урҭ реикәыршара знапы алакыз ахаҿқәа, аха ахьырхәра иақәыршәамкәа иаанханы иҟоуп арҭ ацәгьоурақәа реиҿкааҩцәа», –  ҳәа иҳәеит Аԥсны Апрокуратура Хада Аӡбаратә Усбарҭа аиҳабы, апрокурор Хада актәи ихаҭыԥуаҩ инапынҵақәа назыгӡо Даур Амҷба. 

Аҟәа. Ԥхынгәмза 30, 2024 шықәса. Аԥсныпресс. 2024 шықәса актәи азыбжазы Ареспублика Аԥсны апрокуратура аусбарҭақәа рахь Аԥсны азакәанԥҵара анагӡара ахылаԥшра аҭара аҳәаақәа ирҭагӡаны инашьҭын 79 инарзынаԥшуа азыҳәамҭақәеи арзаҳалқәеи. Абри азы 2024 шықәса актәи азыбжа азы апрокуратура аусбарҭақәа русура аихшьаалақәа рыҟаҵара иазкны имҩаԥысыз апрокуратура Хада аколлегиа аилатәара аҿы дықәгыло адырра ҟаиҵеит атәыла апрокурор Хада актәи ихаҭыԥуаҩ инапынҵақәа назыгӡо Даур Амҷба.

Иалагалаз азыҳәамҭақәеи арзаҳалқәеи рыхәаԥшра аихшьаалақәа рыла абарҭ апрокурорттә зхьаԥшра иадҳәалоу ауснагӡатәқәа нагӡан:

Азԥхьанагарақәа - 11, ақәшаҳаҭымхарақәа - 16, ақәҽанызаарақәа - 6, административтә зинеилагарақәа рзы ирыдыркылеит 11 усԥҟа. Урҭ рыла тәылауаҩык административтә ҭакԥхықәара дақәыршәоуп (ахараԥса иршәоуп).   

Аҟәа. Ԥхынгәымза 30, 2024 шықәса. Аԥсныпресс. 2024 шықәса 6 мыз рыҩнҵҟа иҟалаз  70 амҩа-транспорттә машәыртә хҭыс рҿы 20-ҩык ауаа  ҭахеит.  Иҳаҩсыз 2023 шықәса аиԥш-зеиԥшу аамҭахәҭа иалагӡаны иҟалеит 71 амҩа-транспорттә машәыр. Уаҟа 28-ҩык ауаа  ҭахеит, ҳәа 2024 шықәса актәи азыбжа азы апрокуратура аусбарҭақәа русура аихшьаалақәа рыҟаҵара иазкны имҩаԥысыз апрокуратура Хада аколлегиа аилатәара аҿы дықәгыло адырра ҟаиҵеит атәыла апрокурор Хада актәи ихаҭыԥуаҩ инапынҵақәа назыгӡо Даур Амҷба.

Аҟәа. Ԥхынгәымза 28, 2024 шықәса. Аԥсныпресс. Ақьабзтә ҭынха Ацуныҳәа Кәтол ақыҭан имҩаԥысит.

Жәытә-натә аахыс аԥсуаа ақьабзтә ныҳәа Ацуныҳәа мҩаԥыргоит.

Ақыҭауаа Зегьзымчу имҵаныҳәоит раарыхреи роурақәеи бзиахарц азы.

Традициала ишаԥу еиԥш, ари ақьабзтә ныҳәа ажәҩан аҵаҟа, аԥшьаҭыԥ аҿы имҩаԥыргоит, еизоит ақыҭауаа рҭаацәа рыцны. Дара рзы Анцәа имҵаныҳәара акыр зҵазкуа хҭысуп, гәырӷьароуп. Аныҳәатә гәалаҟара иныруеит ари ақьабзтә ҭынха зҽалазырхәуа дарбанызаалак.

Аҟәа.  Ԥхынгәымза 28, 2024 шықәса. Аԥсныпресс. Аԥснытәи Аиашахаҵаратә Уахәама ахада аиереи Виссарион (Аԥлиаа) Ауахәаматә Хеилак аилатәара аҿы ҩаԥхьа Аԥснытәи Аиашахаҵаратә Уахәама азинтә шьаҭа аганахьала агәҭынчымра ааирԥшит. Аилатәара аартуа иара Аԥсны аканонтә дгылара азхом ҳәа инаҵшьны иазгәеиҭеит.

«Шәааи ааԥхьарак ҟаҳҵап ҳнапхгаҩцәа рҟынӡа инеиуа, аиашахаҵаратә дин ныҟәызго зегьы рҟынӡа инеиуа … Уи ҟаҳамҵар, аиашахаҵаратә дин ныҟәызго ҳажәлар хра злам аҭаглазаашьа роур ҟалоит», - ҳәа адинмаҵзуҩцәа рахь ихы рханы иҳәеит Аиашахаҵаратә Уахәама ахада.

Аигумен Игнати (Киут) – Каман ақыҭан игылоу аԥшьаҩыцқьа Иоанн Ахьҿы ихьӡ зху аберҭыԥ аиҳабы – Аԥсны Аиашахаҵаратә Уахәамеи Урыстәыла Аиашахаҵаратә Уахәамеи аимадара ӷәӷәа рыбжьоуп ҳәа инаҵшьны иазгәеиҭеит.

«Ҳара аԥшьаҩцәас ҳҟалон, доуҳала ҳазҳауан аурыс уахәама аҿы», - ҳәа инаҵшьны иазгәеиҭеит аигумен Игнати.

Аҟәа. Ԥхынгәымза 28, 2024 шықәса. Аԥсныпресс. Иахьа лиубилеи азгәалҭоит Ареспублика Аԥсны Зҽаԥсазтәыз ажурналист,   Аԥсны ажурналистцәа Реидгылеи ажурналисттә Еидгыларақәа Жәларбжьаратәи аконфедерациеи   рлахәыла Заира Иасон-иԥҳа Ҵәыџьба.

Заира Иасон-иԥҳа Ҵәыџьба диит ԥхынгәымза 28, 1949 шықәса рзы. Лара далгеит Ҟазантәи аҳәынҭқарратә Университет ажурналистика афакультет.  

1968 – 1971шш. ақ. Ҟазань иҭыҵуаз агазеҭ  «Советская Татария» аҿы, 1973 - 1980 шш. – Гәдоуҭатәи араионтә газеҭ «Бзыԥ» аҿы аус луан.

1980 шықәса инаркны 1987 шықәсанӡа  – агазеҭ «Советская Абхазия» Гәдоуҭеи Гагреи араионқәа рҿы ахатәы корреспондентс аус луан, 1987 шықәса инаркны 1991 шықәсанӡа – ари агазеҭ алитературеи аҟазареи рыҟәша аиҳабыс аус луан.

1991 шықәса инаркны иахьа уажәраанӡа аус луеит агазеҭ «Республика Абхазия» аҿы. Лара агазеҭ аҳәаанырцәтәии аҩныҵҟатәи аинформациеи  рыҟәша аиҳабысгьы агазеҭ апарламенттә коррепондентсгьы дыҟоуп.

1992-1993 шш. Аԥсны жәлар Рџьынџьтәылатәи еибашьра аан Заира Ҵәыџьба аибашьратә хҭысқәа ирызкны аматериалқәа лыҩуан, амацәаз иҭакыз Ҭҟарчал ақалақь ахь дцаны аҭыԥ аҿы аинформациа еизылгон.

Ԥхынҷкәынмза, 2001 шықәса инаркны нанҳәамза, 2003 шықәсанӡа Заира Ҵәыџьба  Аԥсны аминистрцәа Реилазаара аҿы аԥыза-министр ипресс-маӡаныҟәгаҩыс, амассатә информациа ахархәагақәа рзы ареферентс аус луан.  

Заира Иасон-иԥҳа лзанааҭдырра аҩаӡара ҳараки лнапы злаку ажурналисттә усура  абзиабареи ҭакԥхықәрала азнеиреи рыла далыркаауеит. Лара лнапы иҵыҵхьоу агазеҭтә публикациақәа тематикала реиԥшымзаара азгәоумҭар залшаӡом – акультура, ақыҭанхамҩа, аекономика, атәыла аҩныҵҟатәии адәныҟатәи аполитика, аибашьреи аҭынчреи,атәыла ашәарҭадареи рызҵаарақәа.

Аҟәа. Ԥхынгәымза 26, 2024 шықәса. Аԥсныпресс. Ахәаша, ԥхынгәымза 26 рзы, С. Иа. Ҷанба ихьӡ зху Аԥсуа драматә театр ахыбраҿы Аԥсны Жәлар Реизара адепутатцәеи ауаажәларреи злахәыз аилатәара мҩаԥысит. Уи ареспублика аҿы аҵыхтәантәи аамҭазы ишьақәгылаз ауаажәларра политикатә ҭагылазаашьа иазкын.

Аизара рхы аладырхәит Аԥсны жәлар Рџьынџьтәылатәи еибашьра аветеранцәа, Абыргцәа Рхеилак алахәылацәа, еиуеиԥшым аполитикатәи ауаажәларратә еиҿкаарақәа рхаҭарнакцәа.

Аизара аҿы иқәгылеит Аԥсны абыргца Рхеилак ахантәаҩы Апполон Думаа, Аԥсны Жәлар рартист Кьасоу Ҳагба, Аԥсны аинтеллигенциа Рассоциациа анапхгаҩы Нодар Ҷанба, акультура зҽаԥсазтәыз аусзуҩ, ААУ аҟазара афакултет адекан Ныгәзар Логәуа,  аҭоурыхтә наукақәа ркандидат Гәырам Гәымба, Жәлар Реизара-Апарламент адепутат Кан Кәарҷиа, ауаажәларратә еиҿкаара «Аԥсуа жәлар реиҿкаара» анапхгаҩы Адгәыр Арӡынба,  Аԥсны Афырхацәа Леуан Миқаиеи Вианор Аршбеи.

Еизаз ԥхынгәымза 25 рзы Жәлар Реизара-Апарламент Аиҳабы «Очамчыра, Тҟәарчал, Гал араионқәа рсоциал-економикатә ҿиара аҩаӡара ашьҭыхраз ауснагӡатәқәа рзы» азакәан апроект архынҳәразы инапы зҵеиҩыз аусшәҟәы иалацәажәеит.