Аҟәа. Хәажәкырамза 6, 2025 шықәса. Аԥсныпресс. Хәажәкырамза 5 рзы Москва ақалақь аҿы Аԥсны аиустициа аминистр ихаҭыԥуаҩ Руслан Лагәлааи Урыстәыла аиустициа аминистр актәи ихаҭыԥуаҩ Евгени Забарчуки реиԥылара мҩаԥысит.

Аиԥылараҿы излацәажәоз атема хаданы иҟалеит аҳәынҭқаррақәа реизыҟазаашьақәа рырӷәӷәареи 2024-2025 шықәсқәа рзтәиаӡбаратә експертиза аганахьала аусеицураз апрограмма анагӡареи, ҳәа Апсныпресс ахь адырра ҟанаҵеит Аԥсны аиустициа Аминистрра аҟны.

Аҟәа. Хәажәкырамза 6, 2025 шықәса. Аԥсныпресс. Хәажәкыра 5 рзы Урыстәыла ахада Владимир Путини Аԥсны ахада ин.н. Бадра Гәынбеи реиԥылара мҩаԥысит. Уаҟа иалацәажәеит ҩ-тәылауаҩрак аиура азҵаарагьы.

Аԥсны атәылауаа рзы Урыстәылатәи атәылауаҩшәҟәқәа раиура аус излауа ала ирццакхоит ҳәа абрифинг аҿы Владимир Путини ҿыц иалху Аԥсны Ахада Бадра Гәынбеи реиԥылара аихшьаалақәа дрыхцәажәо аҳәамҭа ҟаиҵеит Урыстәылатәи Афедерациа Ахада ипресс-маӡаныҟәгаҩ Дмитри Песков.

«Атәылауаҩшәҟәқәа рыҭара азҵаарагьы ҳәарада акыр аҵак ду амоуп. Ари апроцессгьы излауа ала ирццакхоит, атәылауаа рыз еиҳа ирманшәалахоит , зегьы ирыцу – уи Аԥсны атәылауааи урҭ изызҳауа рыхшаареи рзы иахьынӡауа еиҳа ирмариахоит, – ҳәа инаҵшьны иазгәеиҭеит Дмитри Песков.  – Уи Урыстәылатәи Аҳәынҭқарра Ахада изы аԥхьа иӡбатәу зҵаараны иҟоуп».

Аҟәа. Хәажәкырамза 6, 2025 шықәса. Аԥсныпресс. Имҩаԥысит ҳазҭалаз ашықәс аҿы Аԥсны ашәҟәыҩҩцәа Реидгылара раԥхьатәи апрезидиум аилатәара.

Аԥсны ашәҟәыҩҩцәа Реидгыла апрезидиум алахәылацәа Аидгыла ахантәаҩы Вахтанг Абхазоу 2024 шықәсазы имҩаԥгаз аусура азы иҟаиҵаз аҳасабырба иазыӡырҩит, иара убас  2025 шықәсазы аусмҩаԥгатәқәа рыплан иалацәажәеит.

Уаанӡа ишьақәыргылаз акомиссиақәа реилазаарақәа аиҭакрақәа алагалан. Алитератор ҿарацәа, аҵараиурҭақәа рҿы еиҿкаау алитературатә кружокқәа аус рыдулара азы Акомиссиа  анапхгаҩыс дҟалеит Нонна Џьынџьалԥҳа.

Аҟәа. Хәажәкырамза 6, 2025 шықәса. Аԥсныпресс. Аԥсны аԥсабарахьчара апрокуратура Амшын Еиқәа аԥснытәи аӡымҽхак иахьаҵанакуа аԥсыӡкыгаӷбақәа рыла аԥсыӡкра аԥҟарақәа реилагара иадҳәалоу афактқәа раарԥшразы аусмҩаԥгатәқәа мҩаԥнагеит.

Аԥсны иҟоу Урыстәылатәи Афедерациа Афедералтә шәарҭадара Амаҵзура Аҳәаахьчратә Усбарҭа акатер ала амшын ихылеит.

Очамчыра араион, аиланхарҭатә пункт Шәкәырча азааигәара аӡымҽхак иахьаҵанакуа  иаарԥшын аилагарақәа ҩба: аԥсыӡкыгаӷбақәа ҩба «Муаммер Кая», «Яхья Юстюн» унеир ахьыҟамло азона аҿы аԥсыӡкра иаҿын.

Аҟәа. Хәажәкырамза 6, 2025 шықәса. Аԥсныпресс.  Урыстәыла Аԥсны афымцамч аназымхо лашарала аиқәыршәарала ацхыраара аҭара иазхиоуп.

Урыстәылатәи Афедерациа Ахада ипресс-маӡаныҟәгаҩ  Дмитри Песков имҩаԥгаз абрифинг аҿы иацы Кремль имҩаԥысыз Урыстәылатәи Афедерациа Ахада Владимир Путини ҿыц иалху Аԥсны Аҳәынҭқарра Ахада Бадра Гәынбеи реиԥылара аихшьаалақәа дрылацәажәеит, ҳәа адырра ҟанаҵоит Аинформациатә Маҵзура  «ТАСС».

Аҟәа. Хәажәкырамза 6, 2025 шықәса. Аԥсныпресс. Хәажәкырамза 4 рзы Очамчыреи Ҭҟәарчали араионқәа рмилициа аусзуҩцәа Ҭҟәарчал араион Уақәым ақыҭан атәылауаҩԥҳәыс Лииа Гәыцкаиа лышьразы гәҩарас дҟаҵаны дааныркылеит 1991 шықәсазы ииз, Уақәым ақыҭаҿы инхо  Беглар Чачуа ҳәа иаанацҳауеит Аԥсны аҩнуҵҟатәи аусқәа Рминистрра апресс-маҵзура.

Аҟәа. Жәабрнмза 6, 2025 шықәса. Аԥсныпресс.  Ҳазҭоу ашықәс жәабранмза иалагӡаны ашәахтәқәа раҳасабала абиуџьет иалагалахеит 465 млн. 524,6 нызықь мааҭ, мамзаргьы даҽакала иуҳәозар 104 % рҟынӡа инаӡо ашәахттә шәатәқәа, ҳәа адырра ҟанаҵоит Аԥсны ашәахтәқәеи аизгақәеи рзы Аминистрра апресс-маҵзура.

Аҟәа. Хәажәкырамза 6, 2025 шықәса. Аԥсныпресс. Амилицииа аусзуҩцәа Аҳәынҭқарра Ахада иалхрақәа рымҩаԥгараан Цандрыԥшь аҳаблаҿы иҟаз алхырҭатә ҭыԥ иақәлаз быжьҩык ааныркылеит, ҳәа атәыла аҩнуҵҟатәи аусқәа Рминистрра ахь азхьарԥш ҟаҵо иаанацҳауеит «Апсны.Иахьа». 

Аинцидент ҟалеит хәажәкырамза 1 азы.  Цандрыԥшь алхырҭатә ҭыԥ иақәлеит атәыла Ахада иалхрақәа аҩбатәи атур аан. Ацәгьоуцәа ахысра аадыртит, абжьыҭаратә кәылаԥ абиуллетенқәа шҭаз иаадырҳәит. Дара абналара рҽаназыршәа Аҳәынҭавтоинспекциа аусзҩцәа Мысратәи аушьҭра-гәаҭаратә Ҭыԥ аҟны раанкыларазы иҟарҵаз адҵақәа ирықәымныҟәакәан ахысра иалагеит. Аиҿахысрақәа рышьҭахь амашьынақәа руак аныҟәцаҩ аԥсҟы изаанымкылаӡакәан ажра дҭаҳаит.

Аҟәа. Хәажәхкырамза 6, 2025 шықәса. Аԥсныпресс Хәажәкырамза 6 рзы апрозаик, апоет, асценарист, ажурналист, ауаажәларратә усзуҩ Фазиль  Абдул-иԥа Искандер иԥсы ҭазҭгьы ихыҵуан  96 шықәса. Фазиль Искандер – Аԥсны акультура аҿы акыр зҵазкуа хаҿны дыҟоуп. Иара италант иабзоураны ареспублика

адунеи зегьы аҿы аԥхьаҩцәа ирдыруа иҟалеит. Фазиль Искандер ихьӡ Аԥсни Урыстәылеи анҭыҵгьы деицырдыруеит.

Фазиль Абдул-иԥа Искандер хәажәкырамза 6, 1929 ш., Аҟәа, АСР Аԥсны — Асовет, аԥсуа шәҟәҩҩы, аурыс прозаик, ажурналист, апоет, асценарист, ауаажәларратә усзуҩы. 1957 ш. инаркны Асовет Еидгыла ашәҟәыҩҩцәа Реидгыла алахәыла. Асовет шәҟәыҩҩцәа Реидгыла Аревизиатә комиссиа хада далахәын. (1986-1991 ш.). Асовет Еидгыла Ашәҟәыҩҩцәа Реидгыла амаӡаныҟәгарҭа анапхгара ацхантәаҩы (1991), Асовет Еидгыла Жәлар рдепутат Аԥснытәи АССР аҟнытә (1989-199 шш.), УА Ахада иҟны иҟоу Урыстәыла Аҳәынҭқарратә премиақәа, ауаҩы изинқәеи ишаҭареи рзы, акультуреи аҟазареи ирызку ахеилак азы акомиссиа рлахәыла. (РАЕН) (1995ш.), Урыстәылатәи аҟазара академиеи (1995ш.) Ихьыԥшым аҟазара. Аестетикеи зхы иақәиҭу аҟазарақәеи ихьыԥшым ракадемиа (1995ш.), ҵабыргылатәи алахәыла, ЕАА Норвичтәи ауниверситет ҳаҭыр зқәу адоктор, Бавариатәи асахьаркыратә ҟазарақәа ракадемиа алауриат, алахәыла (Германиа).

Ԥхьаҟа ишәҟәыҩҩ духараны иҟаз ашәҟәыҩҩы иабду – Ибрагим Искандер, шьҭрала Ирантәын, Аҟәаҟа дааит XIX-тәи ашәышықәса анҵәамҭазы. Акыр амал змаз дырхылҵышьҭран азы уи илшеит ахашәала бзиа змаз ақьармыт зауад ашьақәыргылара. Ибрагим иԥшәма ԥҳәыс Хамсада Агрба даԥсыуан, 1903 ш. азы аҭаацәара зегь рзы иргылоит аҩны, уи аӡбахә Фазиль Искандер иҩымҭақәа рҿы акырџьара иҳәоит. Урҭ рҭаацәара рҿы еиқәханы иҟоуп Аҟәырҟан зны рыԥсадгьыл хәыҷ аҟынтә иаагаз. Ибрагим ԥшьҩык аԥацәа иман, урҭ реиҳабы Абдул ихьӡиҵеит. Ареволиуциа анаҩс, Абдул Искандер иҭаацәатә наплакы ицәыӡуеит аҟнытә, еиуеиԥшым амҵзурақәа ныҟәигоит, ԥасатәи ақьырмыт зауад аҿгьы. Асоветтә тәылауаҩра идимкылаӡеит. Абдул хатә ԥҳәысс дигоит Лели Ҳасан-иԥҳа Мишьелиаԥҳа. Џьгьарда (Чегьем, арахь нхара иааз лҭынхацәа ахьеиланхоз). Ари аҭаацәар мезалианс ҭаацәаран, еиқәнагомызт рҳәон. Лели Мишьелиаԥҳа аҵара лымамызт, хәахәҭҩын, ақалақьтә ԥсҭазаара бзиа илбомызт. Х-ҩык ахшара лыман: лԥеиҳаб Фиридун, лыԥҳа Гьиули, лԥа еиҵыб Фазиль (заатәи адокуметқәа рҿы Фазыльбеи ҳәа дануп). Аиразы аршаҳаҭгаҿы аҟәатәи ашәҟәҭаҩырҭа аиҳабы усҟан иҵарадаз, ахәбатәи аграфа «персюк» ҳәа ианиҵеит. Анаҩс, Искандер-аиҵбы еиуеиԥшым адокументқәа рҿы аџьам, (аиран) ҳәа данырҵон, иреиҳау аҵараиурҭа аҭалараан ауп уи идокументқәа рырҽеира анилша, уи нахыс аԥсуа ҳәа ашәҟәы данын.

Аҟәа. Хәажәкырамза 5, 2025 шықәса. Апсныпресс. Аахыҵ Кавказ ашәарҭадареи аҭышәынтәалареи рзы Жәларбжьаратәи аиҿцәажәарақәа 63-тәи рраунд Женева ақалақь, ЕАР Амилаҭқәа Рхан аҿы хәажәкыра 4-5 рзы имҩаԥысит. Аиҿцәажәарақәа ирылахәын Аԥсни, Аахыҵ Уаԥстәылеи, Урыстәылеи, Қырҭтәылеи, Америкатәи Аштатқәеи, иара убас жәларбжьаратәи аиҿкаарақәа – Ихьыԥшым амилаҭқәа реидгылеи, Евроеидгылеи, Европа ашәарҭадареи аусеицуреи рзы аиҿкаареи рделегациақәа.

Аԥсны адәныҟатәи аусқәа рминистр ихаҭыԥуаҩ инапынҵақәа назыгӡо Одиссеи Бигәаа зхадараҿы дыҟаз аԥсуа делегациа иалахәын Аԥсны адәныҟатәи аусқәа Рминистрра аусзуҩцәа Лаша Аҩӡба, Артур Гагәылиа, иара убасгьы Жәлар реизара-Апарламент адепутат Баҭал Џьопуа.

Аиҿцәажәарақәа рымш хада иаԥхьанеиуан ҩ-ганктәи аконсультациақәа. Аимак-аиҿак еснагь аиԥш ҩ-усутә гәыԥк рыбжьара имҩаԥысуан – ашәарҭадареи агуманитартәи зҵаарақәа рзы.

Аиҿцәажәарақәа рраунд амҩаԥысраан алахәылацәа ирҳәеит аҭынчреи, ашәарҭадареи аҭышәынтәалареи рыхьӡала аусуратә процесс еиҳа хра аманы амҩаԥгара ишазыхиоу.

Аганқәа зегьы Гал ақалақь аҿы Ахҭысқәа раԥырҟәҟәаареи рҭак аҟаҵареи рмеханизм аусура аиҭаларгаразы агәаҳәара шрымоу шьақәдырӷәӷәеит.

Актәи аусутә гәыԥ амшхәаԥштә азҵаара аҩбатәи апункт ралацәажәараан алахәылацәа зегьы иазгәарҭеит аҭыԥқәа рҿы аҭагылазаашьа шҭышәынтәало, ишшәарҭадо. Аԥсны – ганкахьала Қырҭтәылеи Аԥсни, даҽа ганкахьала Қырҭтәылеи Аахыҵ Уаԥстәылеи рыбжьара амч ахархәара мап ацәкразы азинтә усшәҟәы анапаҵаҩра ҟаларц иазыҳәоит.