Аҟәа. Лаҵарамза 27, 2025 шықәса. Аԥсныпресс. Урыстәыла иҟоу Аԥсны ацҳаражәҳәаҩ Алхас Кәыҵниа Африка Амш иазкыз аныҳәатә усмҩаԥгатәқәа ихы алаирхәит, ҳәа адырра ҟанаҵоит Аԥсны Ацҳаражәҳәарҭа апресс-маҵзура.

Аусмҩаԥгатә мҩаԥысуан Урыстәыла адәныҟатәи аусқәа Рминистрра адипломаттә корпус амаҵзура азы аусбарҭа Хада аҿы. Араҟа еизеит аҳәынҭқарратә усзуҩцәа, адипломатиатә миссиақәеи жәларбжьаратәи еиҿкаарақәеи рхаҭарнакцәа.

Лаҵарамза 25 рзы иазгәарҭо Африка Амш, шьақәырӷәӷәан 1963 шықәсазы иҟалаз аҭоурыхтә хҭыс аҳаҭыр азы. Усҟан Аддис-Абеба (Ефиопиа) аҿы имҩаԥысыз раԥхьатәи африкатәи атәылақәа рнапхгарақәа рконференциа аҿы иаԥҵахеит Африкатә акзаара Аиҿкаара (ОАЕ). 2002 шықәса инаркны уи ашьҭрамданы иҟалеит Еиду Амилаҭқәа Реиҿкаара арезолиуциақәа рыла зусура адгылара аиуо Африкатәи Аидгылара.  

Аҟәа. Лаҵарамза 27, 2025 шықәса. Аԥсныпресс. Ареспублика Аԥсны атуризм аминистр Асҭамыр Логәуа аминистр ихаҭыԥуаҩ Асҭамыр Барцыци Дмитри Занҭариеи ицны аобиект аԥхынтәи акурорттә сезон ишазхиоу агәаҭаразы апансионат «Аиҭар»  иаҭааит, ҳәа адырра ҟанаҵоит атуризм Аминистрра аофициалтә саит.

Аҟәа. Лаҵарамза 27, 2025 шықәса. Аԥсныпресс. Акультура аминистр Даур Ақаҩба Нижни Новгород Амшқәа ирызку аусмҩаԥгатәқәа рымҩаԥгаразы Аҟәаҟәа иааз Нижни Новгород аделегациа идикылеит.

Аминистр гәаартыла асасцәа идикылеит, Аҟәеи Нижни Новгороди рыбжьара аусеицура акультуратә еимадареи апроект ҿыцқәа реицынагӡареи рзы иҿыцу алшарақәа аанартуеит ҳәа иазгәеиҭеит.  

Аҟәа. Лаҵарамза 27, 2025 шықәса. Аԥсныпресс. 2025 шықәса алагара инаркны ашәахтәқәеи аизгақәеи Рминистрра аусуреи уи аеффективра ашьҭыхреи иазкын атәыла аԥыза-министр Владимир Делбеи аминистр Едгар Бениеи реиԥылара, ҳәа адырра ҟанаҵоит аминистрцәа Реилазаара апресс-маҵзура.  

Аминистр ишазгәеиҭаз ала, аусура аҿы ашәахтәшәаҩцәа раарԥшреи ашәҟәы рҭагалареи, иара убас ашәахтәшәаҩцәа аҳасабырба злаҟарҵо ашәахтәқәҵара арежим аҭҵаареи аиҳарак ахшыҩзышьҭра аҭахоит.

Аминистрра аргылара аобиектқәа ирӷәӷәоу ахылаԥшра анаҭоит, ҷыдала ахшыҩзышьҭра анаҭоит  адгьылтә шәахтә анапхгараҭара.

Аҟәа. Лаҵарамза 27, 2025 шықәса. Аԥсныпресс. Ахылҟьа-ҿылҟьа зхылҵыз аусҭҵаарақәа  рымҩаԥысшьа иалацәажәеит азинхьчаратәи амчратәи ахылаԥшырҭақәа рхадацәа алархәны Аҳәынҭқарратә шәарҭадара Амаҵзура аҿы имҩаԥысыз аоперативтә еилатәара аҿы.

Аилатәара рхы аладырхәит Аҳәынҭқарратә шәарҭадара Амаҵзура ахантәаҩы Дмитри Дбар, аԥыза-министр ихаҭыԥуаҩ, аҩныҵҟатәи аусқәа рминистр Роберт Кьиут, апрокурор Хада Адгәыр Агрба, аҩныҵҟатәи аусқәа рминистр ихаҭыԥуаҩ инапынҵақәа назыгӡо Руслан Ажьиба.

Аҟәа. Лаҵарамза 27, 2025 шықәса. Аԥсныпресс.  Кавказтәи аинвестициатә Форум аҿы Аԥснытәи астенд даҭааит Урыстәыла анапхгара ахада Михаил Мишустин.

Уи диԥылеит Аԥсны Аҳәынҭқарра Ахада Бадра Гәынба. Иара Михаил Мишустин Аҟәатәи аҳаирбаӷәаза аиҭашьақәыргылара апроект иирбеит.

Аҟәа. Лаҵарамза 27, 2025 шықәса. Аԥсныпресс. Аԥсны Аҳәынҭқарратә ҳазалхратә Еилакы аоперативтә ҟәша аусзуҩцәеи Аҟәа ақалақь аҩныҵҟатәи аусқәа Русбарҭа аусзуҩцәеи лаҵарамза 24 рзы Аҟәа ақалақь аҿы ирыԥшааит  еиуеиԥшым ахьӡқәа змаз акриптовалиута арҳара иазкыз 72 цыра аппарат. 5 аппаратк афымцацәаҳәа иаҿакын, ҳәа адырра ҟанаҵоит Аҳәынҭқарратә ҳазалхратә Еилакы апресс-маҵзура.

Аҟәа. Лаҵарамза 27, 2025 шықәса. Аԥсныпресс. Ԥхынгәымза  1 инаркны аҳәаанырцәтәи аҳәынҭқарра атәанчахәы змауа хазы игоу акатегориақәа ирыҵанакуа атәанчаҩцәа ртәанчахәы ацҵа 1000 мааҭ рыла ацҵара азԥхьагәаҭоуп.  Абри азы Аԥсныпресс ахь адырра ҟаиҵеит Аԥсны Атәанчаҩратә Фонд ахантәаҩы Денис Гәылариа.

«Зтәанчахәы ацҵа иацырҵо атәанчаҩцәа рзеиԥш хыԥхьаӡара 15 795-ҩык рҟынӡа инаӡоит. Уи  10 категориак ирыҵанакуа атәанчаҩцәа роуп. Ацҵақәа ршәаразы ихымԥадатәхо иназыцҵоу аԥаратә хархәагақәа шықәсык азы 189 млн. 540 нызықь мааҭ рҟынӡа инаӡоит», –  ҳәа еиҭеиҳәеит Денис Гәылариа.

Аҟәа. Лаҵарамза 28, 2025 шықәса. Аԥсныпресс. Урыстәылатәи Афедерациа атранспорт аминистр актәи ихаҭыԥуаҩ Валентин Иванов Краснодартәи атәылаҿацә ахь иусуратә ҭаара аҳәаақәа ирҭагӡаны аԥсны-урыстәылатәи аҳәынҭқарратә ҳәәа аҿы иҟоу Ганрацәалатәи автомашьынақәа роушьҭра-гәаҭаратә Ҭыԥ «Адлер» даҭааит.

Аҟәа. Лаҵарамза 28, 2025 шықәса. Аԥсныпресс. Аминистрцәа Реилазаара ақәҵарала Аԥсны имаҷуи ибжьаратәуи анаплакра адгылара иазку 2025 шықәсазтәи апрограмма шьақәдырӷәӷәахеит. 2025 шықәсазы апрограмма иазоужьхоит 326 млн. мааҭ.

Апрограмма иалахәылацәахар рылшоит: атуризм, ауаажәларратә крыфара, ааглыхра аусхкқәа рҿы аус зуа анаплакыҩцәа. Урҭ рнаплакқәа реиҭарҿыцразы, ма аҿыцқәа раԥҵаразы ирҭаху амаругақәа раахәара иақәдырӡуа ахарџь рзыршәоит.  

Апрограмма афинансыркра ахыҵхырҭаны иҟоуп ареспубликатә биуџьет аҟынтәи аԥаратә хархәагақәа. Урҭ рахьтә 200 миллион ареспубликатә биуџьет аҟынтәи иазоушьҭуп, 126 миллион — Урыстәылатәи афинанстә цхыраароуп, ҳәа иаанацҳауеит Аминистрцәа Реилазаара апресс-маҵзура.