Аҟәа. Мшаԥымза 2, 2025 шықәса. Аԥсныпресс. Приднестровтәи Молдавтәи Ареспублика Ахада Вадим Красносельски Бадра Гәынба Аҳәынҭқарра Ахада имаҵура иахагылара идиныҳәалеит.

Идныҳәалараҿы Приднестровтәи Молдавтәи Ареспублика Ахада иазгәеиҭеит Бадра Гәынба иалхра ажәлар рыгәрагареи уи инапхгарала аҳәынҭқарра асуверенитет арӷәӷәара шалыршахо азы агәыӷреи арҵабыргуеит ҳәа иазгәеиҭеит.

«Аԥсны — аҭоурых ду, еицамкуа адоуҳамчи ибеиоу акультуратә ҭынхеи змоу ҳәынҭқарроуп. Агәра ганы сыҟоуп шәара шәнапхгарала  ишаартхо ареспублика аҿиара азы иҿыцу аперспективақәа, уи атәылауаа реизҳазыӷьареи аҳәынҭқарра адунеитә арена аҿы ароль ашьҭыхреи шаланаршо», — ҳәа инаҵшьны иазгәеиҭеит Вадим Красносельски.

Аҟәа. Мшаԥымза 2, 2025 шықәса. Аԥсныпресс. Жәлар Реизара-Апарламент Аиҳабы Лаша Ашәба Аԥсны Ахада имаҵура ахагылара ацеремониа алахәхаразы иааз Ареспублика Ҭаҭарсҭан аделегациа идикылеит, ҳәа адырра ҟанҵоит Жәлар Реихара-Апарламент аофициалтә саит.

Ҭаҭарсҭанынтәи Аԥсныҟа иааит Марат Ахметов – Ареспублика Ҭаҭарсҭан Аҳәынҭқарратә Совет ахантәаҩы ихаҭыԥуаҩ, Камиль Нугаев – Ареспублика Ҭаҭарсҭан Аҳәынҭқарратә Совет абиуџьети ашәахтәқәеи афинансқәеи рзы акомитет ахантәаҩы ихаҭыԥуаҩ.  

Аҟәа. Мшаԥымза 2, 2025 шықәса. Аԥсныпресс. Урыстәылатәи Афедерациа Ахада Иусбарҭа Анапхгаҩы Актәи ихаҭыԥуаҩ Сергеи Кириенко Аҟәа аԥшаҳәа далсны аҭагылазаашьа гәеиҭеит. Иара уаанӡа изеиҭарҳәеит Ҭаҭарсҭани Башкортосҭани рыцхыраарала аԥшаҳәа аиҭашьақәыргыларазы иҟоу азԥхьагәаҭарақәа ртәы.  

Аԥшаҳәа ареконструкциа аҳәаақәа ирҭагӡаны ахәмарратә комплексқәа рыргылара, еиуеиԥшым аусмҩаԥгатәқәа рымҩаԥгаразы аҵакырақәа рышьақәыргылара азԥхьагәаҭоуп. Иара убас иазԥхьагәаҭоу апроектқәа ирылоуп ахәыҷтәы хәмарырҭақәеи аспорттә ҭыԥқәеи, анаԥшааԥшырҭатә гьежьы ашьақәыргылареи. Иазԥхьагәаҭоуп иара убас абетонтә хаҳәцәыла ашьаҟамҩа ачаԥара, амаланыҟәатә мҩахәасҭа ашьақәыргылара.

Аҟәа. Мшаԥымза 2, 2025 шықәса. Аԥсныпресс. Владимир Путин Бадра Гәынба Ареспублика Аԥсны Ахада имаҵура дахьахагылаз идлиныҳәалеит.   

Адныҳәаларатә цҳамҭа атекст даԥхьеит Урыстәыла Ахада Иусбарҭа Анапхгаҩы Актәи ихаҭыԥуаҩ Сергеи Кириенко:

«Ҳаҭыр зқәу Бадра Зураб-иԥа, Аԥсны Аҳәынҭқарра Ахада имаҵура шәахагылара инамаданы гәык-ԥсыкала сшәыдныҳәалоит. Ҳтәылақәа рыбжьара аизыҟазаашьақәа аиҩызареи аусеицуреи рҳәаақәа ирҭагӡаны аринхысгьы аҿиара рымазароуп. Агәра ганы сыҟоуп Шәара Аҳәынҭқарра Ахада имаҵура аҿы шәусура иарбоу аизыҟазаашьақәа анаҩсгьы рырӷәӷәара ишацхраауа. Аԥсни Урыстәылеи рыиашьаратә жәларқәа ирзеиԥшу аҭоурых рымоуп.

Аҟәа. Мшаԥымза 2, 2025 шықәса. Аԥсныпресс. Иахьа Бадра Гәынба официалла Аҳәынҭқарра Ахада имаҵура дахагылоит.

Аҳәынҭқарра Ахада инаугурациа мҩаԥысраны иҟоуп Аҟәа ақалақь, Анапхгаратә хыбрақәа ркомплекс азал Ду аҿы.  Аусмҩаԥгатә алагоит асааҭ 12:00. Ацеремониа рхы аладырхәуеит Аԥсны азакәанԥҵаратә, анагӡаратә, аӡбаратә мчра ахаҭарнакцәа, Алхратә комиссиа Хада алахәылацәа, хыԥхьаӡара рацәала асасцәа.

Аныҳәатә усмҩаԥгатә аҿы ажәахә ҟаиҵоит Аԥсны Жәлар Реизара-Апарламент Аиҳабы Лаша Ашәба. Анаҩс  аныҳәатә церемониа аҿы ҿыц иалху Аҳәынҭқарра Ахада Бадра Гәынба ареспублика Аконституциа инапы ақәҵаны аԥсуа бызшәала «аҭынчреи аҭышәынтәалареи рышьақәгылареи ижәлар реизҳазыӷьареи рзы имч-илша, идыррақәа зегьы дшамеигӡо» азы ижәлар рҿаԥхьа ҭоуба иуеит. Бадра Гәынба ҭоуба иуеит ԥхьаҟатәи иусура аҿы Ареспублика Аԥсны азакәанқәеи Аԥсны Аконституциеи дшақәныҟәало, ауаҩы изинқәеи ихақәиҭрақәеи, Аконституциеи Аԥсны азакәанқәеи, уи ажәларбжьаратә хыдҵақәеи рынагӡашьа дшырхылаԥшло азы.

Аҟәа. Мшаԥымза 2, 2025 шықәса. Аԥсныпресс.  Аахыҵ Уаԥстәыла Ахада Алан Гаглоев Бадра Гәынба Аҳәынҭқарра Ахада имаҵура иахагылра идиныҳәалеит. 

«Алхрақәа рҿы ишәгаз аиааира Аԥсны ажәлар ишәырҭаз агәрагареи аҭышәынтәалареи аҿиареи аизҳазыӷьареи шыҟало азы ргәыӷрақәа шшәыдырҳәалои аанарԥшуеит. Агәра ганы сыҟоуп, шәара шԥышәа, ихшыҩырку шәызнеишьа, шәыстратегиатә хәыцшьа иахьа ареспубликаҿы иҟоу ауадаҩрақәа риааира шалнаршо.   

Аҟәа. Мшаԥымза 3, 2025 шықәса. Аԥсныпресс. 2025 шықәса мшаԥы 3 азы Аԥсны Аҳәынҭқарра адәныҟатәи аусқәа рминистр инапынҵақәа назыгӡо Сергеи Шамбеи Урыстәылатәи Афедерациеи Аԥсны Аҳәынҭқарреи рҿы иҟоу Боливариантәи Ареспублика Венесуела Ацҳаражәҳәаҩ Хесус Рафаель Саласар Веласкеси реиԥылара мҩаԥысит.

Аиԥылара лхы алалырхәит Аԥсны адәныҟатәи аусқәа Рминистрра Латинтәи Америка, Азиа, Азиа-аокеан ҭынчтәи арегион Рддепартамент анапхгаҩы Мадина Зыхәԥҳа.

Аҟәа. Мшаԥымза 3, 2025 шықәса. Аԥсныпресс. Сергеи Шамба Урыстәылеи Аԥсни иҟоу Никарагуа Ацҳаражәҳәаҩ Альба Азусена Торреси иареи реиԥылара мҩаԥигеит.

2025 шықәса мшаԥы 3 азы Аԥсны адәныҟатәи аусқәа рминистр инапынҵақәа назыгӡо Сергеи Шамбеи Урыстәылеи Аԥсни иҟоу Никарагуа Ацҳаражәҳәаҩ, адәныҟатәи аполитикеи Жәларбжьаратәи аизыҟазаашьақәеи рзы Никарагуа Ахада иабжьгаҩ, аминистр Альба Азусена Торрес Мехиеи реиԥылара мҩаԥысит.

Аиԥылара иара убасгьы рхы аладырхәит Аԥсны адәныҟатәи аусқәа Рминистрра Латинтәи Америкеи, Азиеи, Азиа-аокеанҭынчтәи арегиони рдепартамент аиҳабы Мадина Зыхәԥҳа, Урыстәыла иҟоу Никарагуа Ацҳаражәҳәарҭа аҵареи, атуризми, акультуреи рзы абжьгаҩ Диана Гизель Мелендес Кастро.

Аҟәа. Мшаԥымза 3, 2025 шықәса. Аԥсныпресс. Краснодартәи атәылаҿацә агубернатор Вениамин Кондратиев Бадра Гәынба официалла Аҳәынҭқарра Ахада имаҵура ахагылара иазкыз аныҳәатә церемониа далахәын. Уи мҩаԥысит ахаша, мшаԥымза 2 рзы.

«Ҳара ҳрегионқәа ирзеиԥшу аҳәаа анаҩс акыр шықәса ирыбжьоу аиҩызареи аусеицуреи еиднкылоит.  Ҳрызгәдууп наҟ-ааҟ ахәаахәҭра-економикатә, агуманитартә усхкқәа рҿы иҟоу аихьӡарақәа. Убас, иаагозар, аҵыхәтәантәи хәы-шықәса рыла Аԥсни Ҟәбинеи рыбжьара атауареикәыршара 2-нтә иазҳаит. Иумбар залшом ақыҭанхамҩа, ааглыхра, иара убас атуристтә усхкы аҿы еицынарыгӡо апроектқәа иаадырԥшуа аихьӡарақәа», – ҳәа и-Telegram-канал аҿы иҩит арегион ахада.

Аҟәа. Мшаԥымза 3, 2025 шықәса. Аԥсныпресс. Аҳәынҭқарра Ахада Бадра Гәынба М. В. Ломоносов ихьӡ зху Москватәи Аҳәынҭқарратә Университет аректор Виктор Садовничи иира Амш идиныҳәалеит.

Адныҳәаларатә цҳамҭаҿы, ахәҭакахьала  иҳәоуп:  

«Ҳаҭыр зқәу Виктор Антон-иԥа, ишәыдысныҳәалоит шәира Амш. Шәара шәыԥсҭазааратә мҩа  зегьы – анаука, аҵарадырреи агуманисттә идеалқәеи рыҿиара ламысла, гәыкала азааԥсара хра злоу ҿырԥшны иҟоуп.  Шәара ректорс шәыҟазаара аамҭа аҩныҵҟала М. В. Ломоносов ихьӡ зху Москватәи аҳәынҭқарратә университет Урыстәылатәи Афедерациа аҟнеиԥш, адунеи зегьы аҟынгьы иреиҳау аҵараиурҭақәа рыбжьара заҳаҭыр ҳараку, аԥхьагылара змоу аҵараиурҭақәа ируакхеит, атрадициақәа рышьҭрамадареи аинновациақәеи аҵарадырра иҳараку аҩаӡареи иасимволны иҟалеит», - ҳәа иазгәаҭоуп адныҳәалараҿы.

Бадра Гәынба ҷыдала Виктор Садовничи иҭабуп ҳәа еиҳәеит Аԥсни уи астудентцәеи рганахьала иааирԥшуа ахшыҩзышьҭра азы.