Аҟәа. Хәажәкырамза 17, 2024 шықәса. Аԥсныпресс. Аконституциатә Ӡбарҭа ахь Аҳәынҭқарра Ахада иҟынтәи аума, даҽа аҳәынҭқарратә мчра аусбарҭа аҟынтәи аума аҳәынҭқарратә дача «Пицунда» азы аконституциатә закәан аԥыхразы изеиԥшразаалак аҳәамҭақәа нашьҭӡамызт.  Абри атәы аҳәоит Аконституциатә ӡбарҭа аппарат апресс-маҵзура иаланарҵәаз аҳәамҭа  аҿы.

Аконституциатә ӡбарҭа Аппарат апресс-маҵзура аҿы Telegram-канал RESPUBLICA/РЕСПУБЛИКА аҿы ицәырҵыз, Аҳәынҭқарра Ахада Жәлар Реизара-Апарламент аҿы уаанӡа ирыдыркылаз   «Аԥсны аҵакыраҿы иҟоу Пицундатәи аҳәынҭдача амазаратә комплекс Урыстәыла аҭарази ахархәарази» Аԥсны Аҳәынҭқарра Анапхгареи Урыстәылатәи Афедерациа Анапхгареи ирыбжьарҵаз Аиқәшаҳаҭра анагӡара азы» Аконституциатә закәан аԥыхра азҵаарала ааԥхьара ҟаиҵеит ҳәа адырра мцыркуп ҳәа иазгәарҭоит.

Аконституциатә ӡбарҭа Аппарат апресс-маҵзура аҳәамҭа.

Аҟәа. Хәажәкырамза 17, 2024 шықәса. Аԥсныпресс. 68 - шықәса дшырҭагылаз иԥсҭазаара далҵит аҵарауаҩ, Аԥсны аекономикеи азинҭҵаареи Ринститут аиҳабы Заур Шьалашьаа.    

Шьалашьаа Заур Иван-иԥа диит жәабран 28, 1957 шықәсазы Очамчыра араион Ҷлоу ақыҭан.

1974 шықәсазы далгеит Ҷлоутәи абжьаратәи ашкол.

1974-1975 шш. Аҟәатәи аиндустриалтә техникум дҭан.

1975-1977шш. Асовет Архәҭақәа рҿы, Карпатҿықәтәи арратә округ аҿы  арратә маҵзура дахысуан.

1977 шықәсазы дҭалеит, 1983 шш. рзы ибзиаӡаны далгеит П.Лулумба ихьӡ зху Ажәларқәа реиҩызара Ауниверситет (уажәы Урыстәылатәи ажәларқәа реиҩызара Ауниверситет) «аекономикеи жәлар рынхамҩа апланркреи» азанааҭҵарала аекономикеи азини рфакультет. Иара убасҵәҟьа аиспан бызшәа аҟынтәи аиҭагаҩ-ареферент ҳәа аҩбатәи адиплом иоуит.

1983-1986 шш.  Ажәларқәа реиҩызара Ауниверситет  латәаралатәи аспирантура аҿы аҵара иҵон.

Цәыббрамза, 1986 шықәс рзы  «Государственное планирование экономики в Венесуэле в условиях экспансии транснациональных корпораций» атема ала акандидаттә диссертациа ихьчет.  

Жьҭаарамза, 1986 шықәса инаркны лаҵарамза 2017 шықәсанӡа Аԥснытәи аҳәынҭқарратә Университет аҿы алекторс, анаҩс алектор  еиҳабыс аус иуан,  1989 шықәса инаркны 2017 шықәсанӡа ААУ акафедрақәа: жәлар рынхамҩа анапхгараҭареи апланркреи; аменеџьменти афинансқәеи; аменеџьмент; аҳәынҭқарратә напхгараҭареи аменеџьменти рнапхгаҩыс дыҟан.

Аҟәа. Хәажәкырамза 17, 2024 шықәса. Аԥсныпрес.  Асааҭ 20:00 рзы Аԥсны араионқәа зегьы рҟны ашьыжь асааҭ 08:00 инаркны аус зуаз алхырҭатә ҭыԥқәа 30 аркхеит. Аҭыԥантәи алхратә комиссиақәа абжьқәа рыԥхьаӡара иалагеит.

Алхратә комиссиа алахәылацәа еилагарак ыҟан ҳәа азгәаҭам рҳәеит.

Аҟәа. Хәажәкырамза 17, 2024 шықәса. Аԥсныпресс.  Аԥсны аҳәынҭқарратә ҳазалхратә Еилакы аусзуҩцәа Цандрыԥшь аҳабла, аихамҩатә вокзал иацәыхарамкәа  иҟоу Зҭакԥхықәра Ҳәаақәҵоу Аилазаара «Абаза Трейд» иатәу ибаџьдоу ахәаахәҭра адәқьан аҿы  3 000 цыра инарзынаԥшуа  асигареҭ «Chapman» аҳазалхратә закәанԥҵара аилагарала аҭира иадҳәалоу афакт  аадырԥшит. 

Аҟәа. Хәажәкырамза 17, 2024 шықәса. Аԥсныпресс. Аԥсны Жәлар Реизара-Апарламент Аиаҳабы Лаша Ашәба аҟәатәи абжьаратәи ашкол №14 аҟны иҟоу алхырҭатә ҭыԥ  Nº 8003 аҿы ибжьы иҭиит. 

«Ари абжьыҭира Урыстәыла ԥхьаҟатәи аԥеиԥш иазкуп, Аԥсны аԥеиԥш иадҳәалоуп».  Агәра ганы сыҟоуп алхрақәа ибзианы ишымҩаԥысуа. Аԥсны жәлари Урыстәыла ажәлари ирзеиӷьасшьоит аганқәа зегьы рыла аиааирақәеи аихьӡарақәеи – иҷыдоу арратә операциа амҩаԥгараҿы еиԥш, аҭынч ԥсҭазаара иадҳәалоу акциақәеи аусмҩаԥгатәқәеи зегьы рҿы», -  ҳәа ибжьы анаиҭа ашьҭахь ажурналистцәа дрыҿцәажәо иҳәеит Лаша Ашәба. 

Аҟәа. Хәажәкырамза 16, 2024 шықәса. Аԥсныпресс.  Аԥсны Жәлар Реизара-Апарламент ахьӡала жәларбжьаратәи анаԥшыҩцәа рделегациа хәажәкырамза 16 рзы Урыстәылатәи Афедерациа Ахада имаҵурахьы алхрақәа рыҟны иқәгылоу Николаи Харитонови (КПРФ)  Владислав Даванкови (апартиа «Ауаа ҿыцқәа») ралхраԥхьатәи аштабқәа ирҭааит.

Аԥсны Жәлар Реизара-Апарламент адепутатцәа Адгәыр Ҳаразиа, Ахра Ԥачлиа, Бадрик Ԥлиа, Апарламент Аппарат анапхгаҩы Вадим Бжьаниа Урыстәылатәи Афедерациа Акоммунистә Партиа (КПРФ) акомитет Хада аофис иаҭааит. Араҟа дара ирԥылеит Урыстәылатәи Афедерациа Акоммунистә Партиа (КПРФ) аҟынтәи Урыстәыла Аҳәынҭқарратә Дума адепутатцәа Мариа Дроботи Георги Камневи.

Аҟәа. Хәажәкырамза 17, 2024 шықәса. Аԥсныпресс.   Асааҭ 8 рзы Аԥсны иаатит Урыстәылатәи Афедерациа Ахада иалхразы алхырҭатә ҭықәа зегьы. Зынӡа Аԥсны еиҿкаауп   30 алхырҭатә ҭыԥ русура. 

Алхрақәа рхы аладырхәыр алшоит Аԥсны иааиԥмырҟьаӡакәа инхо, мамзаргьы аамҭала иҟоу Урыстәыла атәылауаа.

Алхратә биуллетень аиура азы Урыстәыла атылауаҩ итәылауаҩшәҟәы (аҩныҵҟатәи, мамзаргьы аҳәаанырцәтәи) имазар ахәҭоуп.

Алхырҭатә ҭыԥқәа аартхоит асааҭ 8:00  инаркны 20:00 рҟынӡа абарҭ аҭыӡҭыԥқәа рыла:

Аҟәа. Хәажәкырамза 17, 2024 шықәса.  Аԥсныпресс. Аԥсны Урыстәылатәи Афедерациа Ахада иалхрақәа рымҩаԥгараан ауаажәларратә зинеиҿкаареи ашәарҭадареи рышьақәыргылара иазку аусмҩаԥгатәқәа рзы аҭакԥхықәра зду аҩныҵҟатәи аусқәа рминистр ихаҭыԥуаҩ Беслан Ҷкадуа алхырҭатә ҭыԥқәа рҿы иҟоу аҭагылазаашьа далацәажәеит.

Асааҭ 09:00, хәажәкырамза 16 инаркны хәажәкырамза 18-нӡа Аԥсны аҩныҵҟатәи аусқәа Рминистрра ахатәы еилазаара ирӷәӷәоу аусура арежим ахь ииагоуп.  

«Ихымԥадатәиу агәаҭарақәа зегьы рымҩаԥгара ашьҭахь, Аԥсны иаарту 30-алхырҭатә ҭыԥқәа зегьы абжьыҭира нҵәаанӡа амилициа аусзуҩцәа рыхьчара аҵаҟа иҟазаауеит.   Иара убас Аԥсны иҟоу Урыстәылатәи Афедерациа Ацҳаражәҳәарҭа ахь абиуллетеньқәа ииазго алхратә комиссиа алахәылацәа амилициа аусзуҩцәа рыцзаауеит», -ҳәа иазгәеиҭеит Беслан Ҷкадуа. 

Зынӡа алхырҭатә ҭыԥқәа рҿы ауаажәларратә зинеиҿкаара ашьақәыргыларазы аус руеит  230-ҩык инареиҳаны амилициа аусзуҩцәа.

«Алхырҭатә ҭыԥқәа рҿы аус зуа ахатәы еилазаара ахықәкы хадақәа иреиуоуп алхратә комиссиақәа атәылауаа рыла алхрақәа рҿы ишьақәыгылоу аԥҟарақәа рынагӡара ахылаԥшра аҭараҿы ацхыраара аҟаҵара, алхратә ҭыԥқәа рҿы ауаажәларратә зинеиҿкаареи ашәарҭадареи  реилагарақәа ианаамҭоу азхьаԥшреи абжьыҭира аиԥҟьареи алхратә комиссиа аусура аруадаҩреи иазырхоу егьырҭ азинеилагарақәа рыԥхьырҟәҟәаареи», – ҳәа иазгәеиҭеит Беслан Ҷкадуа. 

Аҟәа. Хәажәкырамза 15, 2024 шықәса. Аԥсныпресс.  Аԥсны Аҳәынҭқарра Ахада Аслан Бжьаниа Аԥсны Аҳәынҭқарраҟны иҟоу Урыстәылатәи Афедерациа Ацҳаражәҳәарҭаҟны Урыстәыла Ахада иалхразы аҿҳәараанӡатәи абжьыҭара далахәын.

Абжьыҭара иара убас иалахәын  Ахада Ихаҭыԥуаҩ  Бадра Гәынба, аԥыза-министр Александр Анқәаб, ашәарҭадара Ахеилак Амаӡаныҟәгаҩ Сергеи Шамба, Аҳәынҭқарра Ахада Иусбарҭа анапхгаҩы Абесалом  Кәарҷиа.

«Иахьа иалагеит Урыстәылатәи Афедерациа Ахада иалхразы абжьыҭира. Урыстәыла – ари ҳтәыла азы аиашьаратә ҳәынҭқарроуп, астратегиатә партниор ауп. Ҳара даараӡа ҳазҿлымҳауп ҳаимабзиаратә еизыҟазаашьақәа рыҿиара. Аԥсны жәлар Урыстәылеи Аԥсни ирыбжьоу аиҩызара ҳаҭырла иазнеиуеит, еиҷаҳауеит, ахә ҳаракны иашьоит акыр шықәсала иҟанаҵо ганрацәалатәи ацхыраара. Сара агәра згоит, ҳтәылақәа ирыбжьоу аиҩызаратә еизыҟазаашьақәа аԥхьаҟагьы аҿиара шроуа, ишыӷәӷәахо ҳтәылақәа реизҳазыӷьара ахьӡала», – ҳәа аҿҳәараанӡатәи абжьыҭара ашьҭахь ажурналистцәа дрыҿцәажәо иҳәеит Аҳәынҭқарра Ахада Аслан Бжьаниа.

Аҟәа. Хәажәкырамза 14, 2024 шықәса. Аԥсныпресс. Аԥсны Жәлар Реизара – Апарламент Аиҳабы Ашәба Лаша «Ливан ачерқьес ассоциациа» ахантәаҩы Риад Цыба напхгара ззиуаз Ливантәи аԥсуа диаспора ахаҭарнакцәа идикылеит. Аби азы адырра ҟанаҵоит Аԥсны Жәлар Реизара-Апарламент апресс-маҵзура.

Аиԥылара иалахәын Апарламент адепутатцәа Рашида Аиба, Винори Бебиа, Нарсоу Салаҟаиа, Баҭал Џьопуа, Инар Гыцба, Аԥсадгьыл ахь ахынҳәразы аҳәынҭқарратә еилакы ахантәаҩы Вадим Ҳаразиа.