Аҟәа. Лаҵарамза 8, 2025 шықәса. Аԥсныпресс. УФ атәылхьчара аминистр Андреи Белоусов Аԥсны атәылахьчара аминистр, аинрал-полковник Владимир Ануа диԥылеит, ҳәа УА атәылахьчара Аминистрра ахь азхьарԥш ҟаҵо адырра ҟанаҵоит Аинформациатә Маҵзура ТАСС.

«Ареспублика Аԥсны – Кавказнҭыҵ ҳаззықәгәыӷуа ҳадгылаҩыс иҟоуп. Аиҩызареи астратегиатә еиҩазареи рзы Аиқәшаҳаҭра аҳәаақәа ирҭагӡаны атәылахьчара азеиԥш ҵакыра шьақәҳаргылоит»,– ҳәа аҳәамҭа ҟаиҵеит Андреи Белоусов.

Аҟәа. Лаҵарамза 8, 2025 шықәса. Аԥсныпресс. Агазеҭ «Аԥсны» Аџьынџьтәылатәи еибашьра Дуӡӡа аҿы Аиааира агара Амш 80-шықәса ахыҵра иазкны аныҳәатә номер азнархиеит. Уаҟа аԥхьаҩцәа ирыдгалахоит  иуникалу аматериалқәа  жәпакы.

Раԥхьаӡа акәны агазеҭ адаҟьақәа ирнылеит аибашьра аҿы иҭахаз Аԥсны ақыҭақәа ирылҵыз рсиақәа рнаҩс афронт аҟынтәи зыҩныҟақәа рахь ихынҳәыз рсиагьы.  Агазеҭ «Аԥсны» аредактор хада Ахра Анқәаб иажәақәа рыла, рыцҳарас иҟалаз, иҭахаз рзы адыррақәа аиҳарак еилкаазар, аибашьра зыхганы зыԥсадгьыл ахь ихынҳәыз рыхьӡқәа зеиқәымхаӡеит:

«Уажәраанӡа аибашьра иалахәыз ақыҭауаа рхыԥхьаӡара азы азеиԥш дыррақәа ракәын иҟаз. Аибашьра иалахәыз рқыҭауаа рзы рҽазҵәылхны аинформациа еизызгоз школ аусзуҩцәа рыбзоурала, ҳара урҭ рсиақәа ркьыԥхьра ҳалагоит».

Аиубилетә номер аҿы икьыԥхьхоит ақыҭақәа Кәтол, Арасаӡыхь (ажурналист Инна Ҳаџьымба агазеҭ ахь иналгаз Хәыхәыҭ Бганба иматериалқәа рыла), Мгәӡырхәа, Ҟәланырхәа,  Хәаԥ ақыҭақәа рыла аинформациа. Ашықәс нҵәаанӡа егьырҭ ақыҭақәа рылагьы аинформациа кьыԥхьхоит. Иазԥхьагәаҭаны иҟоуп аветеранцәа рыхьӡи рыжәлеи рыдагьы, урҭ рфотосахьақәеи, иара убас иааркьаҿны рнысымҩақәеи ркьыԥхьра.

Аҟәа. Лаҵарамза 8, 2025 шықәса. Аԥсныпресс. Аҳәынҭқарра Ахада Адықьса Гогәуа иԥсыжра аиҿкааразы Аҳәынҭқарратә комиссиа аԥҵаразы Адҵа инапы аҵаиҩит.

Аҟәа. Лаҵарамза 8, 2025 шықәса. Аԥсныпресс. Аԥсны Аҳәынҭқарра Ахада Гәынба Бадра иахьа Москва днеит. Урыстәылатәи АФедерациа Ахада Владимир Путин иҟаиҵаз ааԥхьарала Гәынба Бадра иԥшәмаԥҳәыс Ҳашыг Ирма дицны Аџьынџьтәылатә еибашьра дуӡӡаҟны Аиааира 80 шықәса ахыҵра иазку аныҳәатә усмҩаԥгатәқәа ирылахәхоит, урҭ рахьтә ихадараны иҟалоит Ашҭа Ҟаԥшь аҟны имҩаԥысуа апарад. 

Аҟәа. Лаҵарамза 9, 2025 шықәса. Аԥсныпресс. Аԥсны Аҳәынҭқарра Ахада Гәынба Бадра Аԥсны жәлар Аџьынџьтәылатә еибашьра дуӡӡаҟны Аиааира 80 шықәса ахыҵра рыдиныҳәалеит.

Адныҳәалараҟны, ҷыдала, иҳәоуп:

«Акыр иаԥсоу аветеранцәа!

Ҳаҭыр зқәу ҳауаажәлар!

Гәык-ԥсык ала ишәыдысныҳәалоит Аџьынџьтәылатә еибашьра дуӡӡаҟны Аиааира 80 шықәса ахыҵра амш.

Иахьатәи аныҳәа – хьааи гәырҩеи шацугьы, гәалаҟара ҷыдак ацуп, ныҳәа дуӡӡоуп Асовет Еидгыла ажәларқәа зегьы рзеиԥш, аԥсуа жәлар ҳазгьы.

Абри аибашьраан анемец мпыҵахалаҩцәа ирҿагыланы Аԥсадгьыл ду ахьчаразы игылаз ажәларқәа хацәнмырха инарывагылеит 55-нызқьҩык инареиҳаны Аԥсны аҵеицәа. Усҟан, абри ашықәс еиқәаҵәақәа раан Аԥсадгьыл ахақәиҭтәра рхы ақәырҵеит 17 нызқьҩык инареиҳаны ишәыдгылаз шәҩызцәа, шәыуацәа, шәҭынхацәа аӡәырҩы. Урҭ хашҭра рықәӡамкәа ҳгәалашәараҿы иҟазаауеит есқьынгьы.

Аҟәа. Лаҵарамза 9, 2025 шықәса. Аԥсныпресс. Владимир Путин Гәынба Бадреи Аԥсны жәлари Аџьынџьтәылатә еибашьра дуӡӡаҟны Аиааира 80 шықәса ахыҵра амш рыдиныҳәалеит

Урыстәыла Ахада Владимир Путин Аԥсны Аҳәынҭқарра Ахада Гәынба Бадра ихьӡала Аџьынџьтәылатә еибашьра дуӡӡаҟны Аиааира 80 шықәса ахыҵра инамаданы адныҳәалара ҟаиҵеит. Адныҳәалараҟны  ҷыдала иазгәаҭоуп Урыстәылеи Аԥсни ажәларқәа анацизм иаҿагыланы ақәԥараҟны инарыгӡаз аҭоурыхтә роль.

Аҟәа. Ланҵарамза 9, 2025 шықәса. Аԥсныпресс. Урыстәылатәи Афедерациа Ашәарҭадара Ахеилак Ахантәаҩы Ихаҭыԥуаҩ Дмитри Медведев Аԥсны Аҳәынҭқарра Ахада Гәынба Бадра ихьӡала Аџьынџьтәылатә еибашьра Дуӡӡа аҟны Аиааира 80 шықәса ахыҵра инамаданы адныҳәалара ҟаиҵеит.

Адныҳәалара атекст аҟны ҷыдала иазгәаҭоуп Урыстәылеи Аԥсни ажәларқәа рфырхаҵара иамоу аҭоурыхтә роль. 

Аҟәа. Лаҵарамза 9, 2025 шықәса. Аԥсныпресс. Алада Уаԥстәыла Ахада Алан Гаглоев Аԥсны Аҳәынҭқарра Ахада Гәынба Бадра ихьӡала Аџьынџьтәылатә еибашьра дуӡӡаҟны Аиааира 80 шықәса ахыҵра инамаданы адныҳәалара ҟаиҵеит. Адныҳәалара атекст аҟны алада-уаԥстәылатәи атәыла анапхгаҩы ҷыдала иаҵшьны иҳәеит аҭоурых аиқәырхареи абиԥарақәа реимадареи иамоу аҵакы атәы.

Аҟәа. Лаҵарамза 9, 2025шықәса. Аԥсныпресс. Аԥсны Аҳәынҭқарра Ахада Гәынба Бадра Дмитри Медведев Аџьынџьтәылатә еибашьра дуӡӡаҟны Аиааира Дуӡӡа Амш 80 шықәса  ахыҵра идиныҳәалеит.

Ҳаҭыр зқәу Дмитри Анатоли-иҧа!

Аԥсны жәлар рыхьӡала, хаҭала сара сыхьӡала Урыстәыла ажәларгьы Шәаргьы ишәыдысныҳәалоит Аиааира Ду 80 ш. ахыҵра!

Иԥшьоу ари аныҳәа ҳажәлар иуадаҩыз аҧышәара аамҭа ианҭагылаз еиднакылаз рдоуҳа, ргәамч аицамкра иасимволуп. Аџьынџьтәылатә  еибашьра Ду афронтқәа рыҟны еибашьуаз рфырхаҵара наунагӡа аҭоурых аҟны инхоит агәымшәареи Аԥсадгьыл абзиабареи рзы ҿырԥшыганы.

Ҷыдала иҭабуп ҳәа раҳҳәоит аиааира аагара зылшаз абиҧара. Ҳхырхәоит ахақәиҭра иазықәԥоз, аҭынчра ҳзаазгаз автеранцәеи атыл аҟнытә ацхыраара ҟазҵози рыхьӡала. Урҭ рфырхаҵара акзаара жәҩахыр еибыҭарала аидгылара иамоу аҵакы ҳазнархәыцуеит.

Аҟәа. Лаҵарамза 8, 2025 шықәса. Аԥсныпресс. Аԥсны Аҳәынҭқарра Ахада Бадра Гәынба Аԥсны Жәлар рышәҟәыҩҩы, апрозаик, ауаажәларратә усзуҩы,  Д. И. Гәлиа ихьӡ зху Аҳәынҭқарратә премиа алауреат, «Ахьӡ-Аԥша» аорден  I аҩаӡара занашьоу Алықьса Ноча-иԥа Гогәуа иԥсҭазаара иалҵра инамаданы гәалсра дула  иуацәеи иҭынхацәеи дрыдышшылоит.

«Ари цәыӡ дууп иааизакны ҳмилаҭ культуреиԥш, ҳаамҭазтәи амилаҭтә литература азгьы. Алықьса Ноча-иԥа Гогәуа ԥсра зқәым иҩымҭақәа рыла амилаҭтә литература адунеитә ҩаӡара аҟынӡа ашьҭыхра зылшаз ашәҟәыҩҩцәа дреиуоуп. Абаҩхатәра ду, аҟазара ду иарҿиаз ашәҟәыҩҩы ирҿиамҭақәа Аԥсны анҭыҵгьы инарҭбааны ирылаҵәахьеит, урҭ иага аамҭа царгьы ҳажәлар ирҿахәҳәаганы инхоит.