Аҟәа. Цәыббрамза 4, 2025 шықәса. Аԥсныпресс. Аԥсны аиустициа Аминистрра аӡбаратә нагӡаҩцәа рмаҵзура иҷыдоу аҟәшеиҵақәеи ирласны азхьаԥшра агәыԥқәеи, Урыстәылатәи Афедерациа аӡбаратә қәҵарақәа рынагӡара аиҿкааҩцәа рмаҵзуреи Аахыҵ Уаԥстәыла Аиустициа Аминистрра аӡбаратә қәҵарақәа рынагӡара аиҿкааҩцәа рмаҵзуреи I Жәларбжьаратәи рҽазыҟаҵарақәа Аԥсны, цәыббрамза  4 - 7 рзы имҩаԥысуеит. Абри азы адырра ҟанаҵоит Аԥсны аиустициа Аминистрра апресс-маҵзура.

Аҽазыҟаҵарақәа мҩаԥнагоит Аԥсны аиустициа Аминистрра. Урҭ ажәлар рԥыза атәыла Актәи Ахада Владислав Григори-иԥа Арӡынба  (1945 - 2010 шш.) игәалашәара иазкуп.

Аҽазыҟаҵарақәа рхықәкы хада – аусеицура арӷәӷәареи иуадаҩу аҭагылазаашьақәа раан иаку азнеишьа ашьақәыргылареи. Ҷыдала ахшыҩзышьҭра аҭахоит аԥышәеимадара, атактикатә зыҟаҵара аиӷьтәра, акомандатә ҳәоуеиқәшәареи абжьааԥнытәи амаҵзура еиԥшым аҭагылазаашьақәа раан аусеицуратә лшареи рыҩаӡара ашьҭыхра.

Аҟәа. Цәыббрамза 4, 2025 шықәса. Аԥсныпресс. Цәыббрамза 3 рзы ироуз аоперативтә дырра ахархәарала Аԥсны аҳәынҭқарратә ҳазалхратә Еилакы аусзуҩцәеи Аҟәа ақалақь аҩныҵҟатәи аусқәа Русбарҭа аусзуҩцәеи Аҟәа ақалақь, Наӡаӡе лымҩа, аҩны № 1 аҿы агәаҭарақәа мҩаԥыргеит. Аҩны аԥшәымас дамоуп Инга Гаделиаԥҳа, ҳәа адырра ҟанаҵоит Аҳәынҭқарратә ҳазалхратә Еилакы апресс-маҵзура.

Аҟәа. Цәыббрамза 4, 2025 шықәса. Аԥсныпресс. 1992-1993шш. Аԥсны жәлар Рџьынџьтәылатәи еибашьраан хабарда ибжьаӡыз ргәалашәара иазкыз акциа мҩаԥыргеит цәыббрамза 3 рзы Аҟәа ақалақь аҿы.

Традициала уи мҩаԥыргоит нанҳәамза 30 – мчыла ирӡыз Жәларбжьаратәи ргәалашәара амш аҽны. Сынтәа еиуеиԥшым амзысқәа ирыхҟьаны уи маҷк ииагахеит.

1992-1993шш. Аԥсны жәлар Рџьынџьтәылатәи еибашьраан хабарда ибжьаӡит ҳәа иԥхьаӡоуп  171-ҩык. 47-ҩык рыԥсыбаҩ рхаҭара шьақәыргыланы доусы рҭаацәа ирыҭан.  

Аҟәа. Цәыббрамза 3, 2025 шықәса. Аԥсныпресс.  Адунеизегьтәи аҿар рфестиваль ихадоу аусмҩаԥатәқәа иреиуоу Жәларбжьаратәи аҿар реизара «Россия согревает» иалахәхараны иҟоу реиԥылара мҩаԥысит Аԥсны аҿари аспорти русқәа рзы Аҳәынҭқарратә Еилакы аҿы.

Аиԥылара рхы аладырхәит аԥыза-министр ихаҭыԥуаҩ, аҿари аспорти русқәа рзы Аҳәынҭқарратә Еилакы ахантәаҩы инапынҵақәа назыгӡо Ҭарашь Ҳагба, уи ихаҭыԥуаҩ Роман Ҵкәуа, Аҳәынҭеилакы астатс-маӡаныҟәгаҩ Идрис Кара-Осман-оглы, аҿар рыҟәша аиҳабы Беслан Аршба, Жәлар Реизара-Апарламент адепутат Инар Гыцбеи Аԥсны адәныҟатәи аусқәа Рминистрра  астратегиатә усеицура адепартамент аиҳабы Џьамал Бганба.

Аҟәа. Цәыббрамза 3, 2025 шықәса. Аԥсныпресс. Ԥхынгәымза 1, 2025 шықәсазы Аԥсны акредиттә еиҿкаарақәа рҿы иҟоу адепозитқәа рзеиԥш еицҵалыҵ  3 млрд. 562,6 млн. мааҭ рҟынӡа инаӡон, уи 6,6% (251,4 млн. мааҭ) рыла еиҵоуп ԥхынгәымза 1, 2024 шықәсазы аиԥш-зеиԥшу аамҭахәҭа иаҿырԥшны уахәаԥшуазар. Уи аилазаараҿы аиҳарак хазхаҭалатәи ахаҿқәа рԥарашьҭаҵақәа рахь иаҵанакуеит – 89,3% (3 млрд. 182,4 млн. мааҭ).

Ауааԥсыра рԥарашьҭаҵақәа рҟынтәи абжа акоммерциатә банк ала иадыԥхьалоуп аҳәынҭқарра 100% рыла акоммерциатә банк –Иаарту Акционертә Еилазаара Аԥсны Аҵәахырҭатә банк аԥҟаԥҵәатә капитал аҿы алахәхарала.

Аҟәа. Цәыббрамза 3, 2025 шықәса. Аԥсныпресс. Цәыббрамза 3 рзы 33 шықәса ҵит  Москва ақалақь аҿы Урыстәыла, Қыртәыла, Аԥсны ахадацәа реиԥлара аҿы аԥсуа — ақырҭуа еимакы аҭышәныртәаларазы аиқәшаҳаҭра анапаҵаҩра мҩаԥысижьҭеи.

Цәыббрамза 3, 1992 шықәса рзы  Москва ақалақь аҿы Борис Ельцин, Едуард Шеварнаӡе, Владислав Арӡынба реиԥылара мҩаԥысит. Аиԥылара иара убас иалахәын Нхыҵ Кавказ ареспубликақәа рнапхгаҩцәа.

Аҟәа. Цәыббрамза 3, 2025 шықәса. Аԥсныпресс.  Цәыббрамза 3 рзы Никарагуа Аԥсны ахьыԥшымра аназханаҵа амш  17 шықәса ахыҵит. Ареспублика Никарагуа – Урыстәылатәи Афедерациа ашьҭахь аҩбатәи тәылоуп Аԥсны ахьыԥшымреи асуверенитети  азхазҵаз.

Цәыббрамза 3, 2008 шықәса рзы Никарагуа Апрезидент, ахьыԥшымра аиура амҩаҿы иҟоу аԥышәарақәа зегьы ртәы здыруа, анапхгаҩ ду, Аԥсны аҩыза ду, акомендант Хосе Даниель Ортега. Уи итәыла арбџьармчқәа раԥҵара ҟалеижьҭеи 29-шықәса аҵра иазкны Манагуа ақалақь аҿы имҩаԥгаз амитинг аҿы аруаа рҿаԥхьа дықәгыло Никарагуа аофицалла Аахыҵ Уаԥстәылеи Аԥсни рхьыԥшымреи рсуверенитети азханаҵоит ҳәа аҳәамҭа ҟаиҵеит.

Ҩымш рышьҭахь, цәыббрамза 5, 2008 шықәса рзы Даниель Ортега иӡбамҭа Аахыҵ Уаԥстәылеи Аԥсни рхьыԥшымреи рсуверенитети разхаҵаразы адекретқәа рыла ишьақәирӷәӷәеит. Арҭ аусшәҟәқәа инацҵаны апарламент аҿы ашьақәырӷәӷәара зҭахым аҳәынҭқарратә хьыԥшымра азхаҵаразы аҵыхәтәантәи аофициалтә закәаншәҟәқәаны иҟалеит. Абри азы Никарагуа адәныҟатәи аусқәа Рминистрраҿы имҩаԥгаз апресс-конференциа аҿы алаҳәара ҟаҵан.

Аҟәа. Цәыббрамза 3, 2025 шықәса. Аԥсныпресс. Аҳәынҭқарра Ахада ихаҭыԥуаҩ Беслан Бигәаа Аҳәынҭқарра Ахада Бадра Гәынба иусԥҟала нанҳәамза 18, 2025 шықәса рзы иаԥҵаз «Иаку асоциалтә шәахтә азы» Аԥсны Аҳәынҭқарра Азакәан апроект аиӷьтәра иазку аусуратә гәыԥ актәи аилатәара мҩаԥигеит.

Аҟәа. Цәыббрамза 3, 2025 шықәса. Аԥсныпресс. Аԥсны адәныҟатәи аусқәа рминистр Олег Барцыц Никарагуа адәныҟатәи аусқәа рминистр Вальдрак Џьентске иахь Аԥсны ахьыԥшымреи аҳәынҭқарратә суверинитети азхарҵеижьҭеи 17 шықәса аҵра иазкны ашәҟәы наишьҭит. Абр азы адырра ҟанаҵоит Аԥсы адәныҟатәи аусқәа Рминистрра апресс-маҵзура. 

Аҟәа. Цәыббрамза 2, 2025 шықәса. Аԥсныпресс.  Аҳәынҭқарра Ахада Дамасктәи жәларбжьаратәи ацәыргақәҵа  иалахәыз аделегациа идикылеит. Абри азы  адырра ҟанаҵоит Аҳәынҭқарра Ахада ипресс-маҵзура.