Аҟәа. Цыббрамза 25, 2023 шықәса. Аԥсныпресс. Ахәыҷтәы ҭыхымҭақәа рцәыргақәҵа «Москва доусы игәаҿы» аатит Аҟәа иҟоу Москва Аҩны аҿы. Аекспозициа аҿы ицәыргақәҵоуп 6 шықәса инаркны 17-нӡа зхыҵуа еиуеиԥшым атәылақәа рҟынтәи – Москва ақалақь адәныҟаекономикатәи жәларбжьаратәи аимадарақәа Рдепартаменти Москватәи аидгьылуаа Рыҩни рыла еиҿкаау еихьӡылоу аконкурс алауреатцәеи аиааиара згахьази  асахьаҭыхыҩ ҿарацәа русумҭақәа.

Аекспозициа иаҭаауа асасцәа «Москва ахәыҷқәа рзы», «Москва аныҳәатә», Ашәышықсақәа, ашықәсқәа ирылҵны иааз ақалақь», уҳәа атемақәа рыла иаԥҵоу Белоруссиа, Испаниа, Гватемала, Болгариа, Катара, уҳәа егьырҭ атәылақәа жәпаки рҟынтәи асахьаҭыхыҩ ҿарацәа русумҭақәа рбар рылшоит. Аусумҭақәа ирнубаалоит Москва ақалақь аҭыԥ ԥшӡарақәа, аҳҭнықалақь апеизажқәа, аныҳәатә ақалақьтә атмосфера, иара убас ахәыҷқәа рыблала ақалақь аҭоурых. Аусумҭақәа еиуеиԥшм атехникақәа: аӡшәыгала, апастель, аграфика, аҿыханҵа, уҳәа рыла инагӡоуп.

Аусумҭақәа рхыԥхьаӡараҿы иҟоуп аҭыхымҭа «Аиаҵәара ҭалаҳәоу Москва». Уи автор, аконкурс «Москва доусы игәаҿы» алауреатс иҟалаз, Даур Бигәаа ихьӡ зху Гәылрыԥшьтәи абжьаратәи ашкол аҵаҩы Дарина Соиа.

Аҟәа. Цәыббрамза 25, 2023 шықәса. Аԥсныпресс. Константин Ахба самбо азы жәларбжьаратәи акласс аспорт азҟаза Владимир Соловиов ихьӡ зху абокс азы атурнир аҿы аиааира игеит.  Атурнир цәыббрамза 22 инаркны 24-нӡа Санкт-Петербург ақалақь имҩаԥысуаз наҟ-ааҟ ҩыџьа реиндаҭларазы XII Афестиваль аҳәаақәа ирҭагӡны еиҿкаахеит.

Аԥсны аҿари аспорти русқәа рзы аҳәынҭқарратә Еилакы иҟанаҵо адыррақәа рыла, аԥснытәи аспортсмен  зыкапантә категориа 52 кьыла рҟынӡа иҟоу рыбжьара Санкт-Петербург ақалақь Аолимпиатә гәыӷрақәа рышкол ахьӡала дықәгылеит. Афиналтә еиндаҭлара аҿы Константин Ахба Ленинградтәи аобласть аспортсмен Илиа Кустариов дииааит.

Аҟәа. Цәыббрамза 25, 2023 шықәса. Аԥсныпресс.  Цәыббрмза 26 – 27 рзы Ф.А. Искандер ихьӡ зху Аҳәынҭқарратә аурыс драматә театр аҿы  А.С.Пушкин ироман дуӡӡа «Евгени Онегин» ала иқәыргылоу аспектакль аԥхьарбара мҩаԥысраны иҟоуп. Абри азы адырра ҟанаҵоит Аурыс драматә театр аофициалтә саит.

Ԥсра зқәым «Евгени Онегин» ззымдыруа дыҟамзар ҟалап. Аԥсҭазаара ҵакыс иамоу аилкааразы ақыҭарахь еихаз, аха араҟагьы уи анизымԥшаа агәҿыӷь иагоз, изцәагои ҳәа игәызианӡа иҟаз аҭаԥҳа  азнаказы дхыхны, нас лгәы ҿызкааз, адуель аҿы зҩыза гәакьа иааигәыдҵан дызшьыз,  ацәгьацәыԥхамшьашәа иҟоу ахаҵа изку ахристоматиатә сиужет Искандер Итеатр аспектакль ҿыц аҿы дарбанызаалак ахәаԥшыҩ изааигәоу абзиабара аԥшаара аҭоурых аарԥшрахьы ииасуеит.   

Аспектакль ахәмарра адикорациақәа рышьақәыргылареи истильрку акостиумқәеи рхархәарала имҩаԥысуеит. Аха убри аан уи аурыс психологиатә театр атрадиақәа инарықәыршәаны ишьақәыргылоуп. Араҟа акцент хада актиорцәа роуп изықәку, урҭ апоетикатә текст арҵабыргра «аԥсы аҭаҵара» рылшартә аҟаҵара.

Аклассикатә текст аанханы иахьыҟоу ақәыргыламҭа аиумор ласи акы иаламҩашьо пушкинтәи аирониеи рыла игәылырҭәаауп. Араҟа иҟоуп угәы шьҭызхуа еиԥш улахь еиқәызҵогьы, узырхәыцуа, иара убасҵәҟьа ахыркәшамҭа азыԥшрала угәы зырхыҭхыҭуа аҭыԥқәа.

Арежиссиор Сергеи Ефремов уажәаԥхьагьы «Евгени Онегин» ала аспектакльқәа ықәиргылахьан. Аха хазы игоу аус зуа  ахаҿы – иналукааша асахьаҭыхыҩ Денис Солнцев иқәиргыло алашара змоу Аурыс драматә театр аспектакль, аԥсуа актиорцәа ртемпераменти ренергиеи аклассикатә тексти аурыс театр зеиӷьаҟам атрадициақәеи ахьеиларсу иҷыдоу асахьаркыратә лҵшәа аазырԥшраны иҟоу иҿыцу рҿиамҭаны иҟалоит.  

Аспектакль, А.С.Пушкин ироман ахаҭагьы еиԥш, ухызхуа абзиабара аҭоурых ала ишьаҭарку игәмырҿыӷьгоу, иара убри аамҭазы апарадоксқәеи амаӡақәеи злоу жәабжьны иҟоуп.   

Аҟәа. Цәыббрамза 24, 2023 шықәса. Аԥсныпресс. Очамчыра ақалақь аҿы цәыббрамза 23 азы имҩаԥысит атлетикалас азы акросс. Аицлабрақәа рхы аладырхәит Аҟәа, Гәдоуҭа, Очамчыра, Гал ақалақьқәа рҟынтәи қәрала  еиуеиԥшым 80-ҩык инарзынаԥшуа аспортсменцәа. Аиԥхынҩлара аламҭалазы уи алахәылацәа Аԥсны жәлар Рџьынџьтәылатәи еибашьра аҿы иҭахаз рбаҟа амҵан ашәҭ шьыҵәрақәа шьҭарҵеит.

Аҭыԥҳацәа 3 км. рҟынӡа иҟоу адистанциа аҿы иҩуан, арԥарцәа – 5 км.

Акросс аҿы аҭыԥҳацәа рыбжьара аиааира лгеит Аԥсны еизгоу акоманда аԥыза Валериа Дмитриенко. Аҩбатәи аҭыԥ аанылкылеит Ангелина Рушьак, ахԥатәи - Шахзода Санакулова. 

Арԥарцәа рыбжьара аиааира игеит еицырдыруа атлетикалас аспортсмен, Аԥсны анҭыҵ имҩаԥысуаз аицлабрақәа рҿы изныкымкәа аиааирақәа згахьоу Денис Саманба. Аҩбатәи аҭыԥ ааникылеит Дамеи Конџьариа, ахԥатәи аҭыԥ ааникылеит арратә қалақь ахаҭарнак Магомед Мартус. 

Денис Саманба изы хә-километрак рҟынӡа инаӡо адистанциа иԥсҭазаараҿы раԥхьатәи акәын.  Уаанӡа уи иауу адистанциақәа мацара рҿы дықәгылон, уи икьаҿу адистанциа аҿы аҩра дахьашьцыламыз азы митәык изыманшәаламызт.

Сухум. 24 сентября 2023. Апсныпресс. Дауҭ Гәыблиа наҟ-ааҟ ҩыџьа реиндаҭлара «Mixed Martial Arts» азы Урыстәыла Ахраҿа агаразы атурнир аҿы иаиаара игеит. Атурнир мҩаԥысуан цәыббрамза 22 – 23 рзы Омск ақалақь аҿы.

Аԥсны аҿари аспорти русқәа рзы аҳәынҭқарратә Еилакы иҟанаҵо адыррақәа рыла, Дауҭ Гәыблиа 77,1 кьыла иҟоу акапантә категориа аҿы Краснодартәи атәылаҿацә еизгоу акоманда аилазаараҿы дыҟоуп. Аспортсмен шәачатәи аклуб «Левша» аҿы  Ашоҭ Ԥашиан инапхгарала иҿазыҟаиҵоит.

Аҟәа. Цәыббрамза 24, 2023 шықәса. Аԥсныпресс. Цәыббрамза 22, 2023 шықәсазы Гь.А.Ӡиӡариа ихьӡ зху Аҳәынҭқарратә премиа аиуразы акомиссиа аилатәараҿы аконкурс аихшьаала ҟаҵан.

Аконкурс аҿы ицәырган 2020 шықәса инаркны  2022-нӡа иҭыжьыз аҭҵаарадырратә усумҭақәа.

Аҟәа. Цәыббрамза 20, 2023 шықәса. Аԥсныпресс.  Аԥсны Жәлар Реизара-Апарламент Аиҳабы Лаша Ашәба Аахыҵ Уаԥстәыла Ареспублика Апарламент ахантәаҩы Алан Алборов Аахыҵ Уаԥстәыла Ареспублика Амш идиныҳәалеит.

Адныҳәалараҿы иаҳәоит:

«Ҳаҭыр зқәу Алан Иура-иԥа! Аԥсны Жәлар Реизара-Апарламент ахьӡала хаҭала Шәареи Аахыҵ Уаԥстәыла Апарламент адепутатцәеи Аахыҵ Уаԥстәыла Амш шәыдысныҳәалоит!

Аахыҵ Уаԥстәыла ажәлар цәыббрамза  20, 1990 шықәсазы иалнахыз амҩа шәреспублика ҳаамҭазтәи аҭоурых шьақәнаргылеит. Иҳаҩсыз   ашықәсқәа рзы Аахыҵ Уаԥстәылатәи Ареспублика анапхгареи ажәлари асуверенитети ахьыԥшымреи рахь инагаз амҩаҟны изыниоз ауадаҩрақәеи ашәарҭарақәеи ириааины иаадырԥшуан ԥгара змам акреи аидгылареи.  

Аҟәа. Цәыббрамза 22, 2023 шықәса. Аԥсныпресс. Аԥсны анукақәа Ракадемиа апрезидент, академик, Урыстәылатәи анаукақәа Ракадемиа аҳәаанырцәтәи алахәыла, Урыстәыла Анаукақәа Ракадемиа афилологиатә наукақәа рдоктор Зураб  Џьапуа «Аахыҵ Уаԥстәылатәи Ареспублика зҽаԥсазтәыз анаука аусзуҩ». 

Уи азы Аусԥҟа инапы аҵаиҩит Аахыҵ Уаԥстәылатәи Ареспублика Ахада Алан Гаглоев.

Аҟәа. Цәыббрамза 22, 2023 шықәса. Аԥсныпресс. Аԥсны аинтеллигенциа Аидгылара апрезидиум алахәылацәеи атәыла адәныҟатәи аусқәа рминистр Инал Арӡынбеи реиԥылара мҩаԥысит аԥшьаша, цәыббрамза 21 рзы, ҳәа адырра ҟанаҵоит Аԥсны адәныҟатәи аусқәа Рминистрра Амедиацентр.
Аиԥылараҿы ирылацәажәеит Аԥсны адәныҟатәи аполитикеи Алада Кавказ ашәарҭадареи ирыдҳәалоу актуалра злоу азҵаарақәа жәпакы.
Аиԥылараҿы Аԥсны адәныҟатәи аусқәа Рминистрреи Аԥсны аинтеллигенциа Аидгылареи рыбжьара еиҳа активла аусеицура алыршара иазку апланқәа алкаахеит. 

Аҟәа. Цәыббрамза 22, 2023 шықәса. Аԥсныпресс. Атәыла аԥыза-министр Алеқсандр Анқәаб Лагәлаа Руслан Виачеслав-иԥа аиустициа аминистр ихаҭыԥуаҩыс иҟаҵара азы ақәҵара инапы аҵаиҩит.

Лагәлаа Руслан Виачеслав-иԥа диит цәыббрамза 8, 1987 шықәсазы Белорусстәи Асоциалтә Советтә Республика Гроднентәи аобласт Лидтәи араион Дитва аҳабла аҿы.