Аҟәа.  Ажьырныҳәамза  5,  2026 шықәса. Аԥсныпресс.  Ажьырныҳәамза 5 рзы  33 шықәса  ахыҵуеит Аҟәа ахақәиҭтәра иазкны имҩаԥгаз ианартәи ажәылара. Ажьырныҳәамза 5, 1993 шықәсазы аԥсуа еибашьцәа Қырҭтәыла Аҳәынҭсовет аруаа ирымпыҵакыз Аҟәа ақалақь ахақәиҭтәра иазкыз, аха илҵшәадахаз ажәыларатә операциа хацдыркит. 

Аҟәа ахақәиҭтәразы 1993 шықәса ианар 5 рзы ихацыркыз ажәылараан иҭахеит 37-ҩык аԥсуа еибашьцәа, шәҩык инареиҳаны ахәрақәа роуит. Амчқәа ахьеиҟарамыз иахҟьаны, ҩаԥхьа ҳар хьаҵыр акәхеит. Ари ажәылара шыманшәаламхазгьы, уи Аиааира агара амҩаҿы акыр зҵазкуа хҭысны иҟалеит.

Аҟәа. Ԥхынҷкәынмза 30, 2025 шықәса. Аԥсныпресс /Алеқсеи Шамба/. Ақалақьтә Еизара адепутатцәа аҩаша, ԥхынҷкәынмза 30 рзы имҩаԥысыз аилатәара аҿы 2026 шықәсазы ақалақь абиуџьет рыдыркылеит. Иазԥхьагәаҭоу ақалақь ахашәалахәқәа реицҵалыҵ 2 млрд. 257 млн. 789 нызықь мааҭ рҟынӡа инаӡоит, аныхтәқәа  –  2 млрд. 338 нызықь мааҭ рҟынӡа.  

Ахашәалахәытә хәҭа 174 млн. мааҭ рыла ашьҭыҵра аҭыԥантәи абизнес аусура аеффективра ацлареи ашәахтәқәа реизгара иадҳәалоу аҭагылазаашьа аиӷьтәхареи ирыдҳәалахеит. Иара убри аамҭазы ақалақь аресурсқәа еиҳа ихшыҩркны рхархәара акурс алнахит, уи иабзоураны азеиԥш ныхтәқәа иҳаҩсыз ашықәс арбагақәа ирҿырԥшны уахәаԥшуазар, 40 млн. мааҭ рыла еиҵахеит.  

Аныхтәқәа реиҵатәра шыҟазгьы, асоциалтә усхкы афинансркра иазҳаит. Абиуџьеттә еиҿкаарақәа русзуҩцәа руалафахәы азеиԥш фонд 150 млн. мааҭ рыла иазҳаит, уи амуниципалтә сектор аҿы абжьаратәи аулафахәы  21 512 мааҭ рҟынӡа ишьҭнахуеит. Иарбоу аԥаратә хархәагақәа реиҳарак аҵарадырра асистема адгылара аҭара иазырхахоит, уи иазоужьхоит 806 млн. мааҭ инареиҳаны.  Уи иабзоураны аҵараиурҭақәа рныҟәгара адагьы арҵаҩцәа руалафахәы доусы рыквалификациа инақәыршәаны 5 - 30% рҟынӡа ашьҭыхрагьы алыршахоит.

Аиԥш-зеиԥшу аҭагылазаашьа иара убас ишьақәгылеит агәабзиарахьчара аусхкы аҿы: иазоужьыз 397 млн. мааҭ рҟынтәи аиҳарак аҳақьымцәеи амедиаҳәшьцәеи рџьаԥсақәа 15%, 10% рҟынӡа риндексациа аҟаҵара иазырхахоит.

Аҟәа. Ԥхынҷкәынмза 31, 2025 шықәса. Аԥсныпресс. Урыстәылатәи Афедерациа  Ахада Владимир Путин Аԥсны Аҳәынҭқарра Ахада Бадра Гәынба Ашықәс ҿыци Қьырса ныҳәеи идиныҳәалеит. 

 Адныҳәалараҿы, ҷыдала, иҳәоуп:  

"Ҳаҭыр зқәу Бадра Зураб-иԥа, 

Гәык-ԥсык ала ишәыдысныҳәалоит Ашықәс ҿыци Иаса Қьырса Иира аныҳәа лашеи.  

Ииасуа ашықәс азы Урыстәылеи Аԥсни рыбжьара аидгылареи астратегиатә усеицуреи реизыҟазаашьақәа қәҿиарала рыҿи ара мҩаԥысуан. Хәажәкырамзеи лаҵарамзеи рзы Москва ҳаиԥыларақәа акыр ихәарҭан, иалдыршеит ҳусеицураҿы еицыҳзыфеидоу  ахырхарҭа ҿыцқәа разгәаҭара.  

Ҳаргьы, ҳәарада, иконструктивтәу ҳусеицура иацаҳҵоит — урыстәылатәии аԥснытәии ажәларқәа реизҳазыӷьаразы, арегионалтә шәарҭадареи аҭышәынтәалареи ралыршаразы.   Ҳаҭыр зқәу Бадра Зураб-иԥа, Шәара аԥхьа шәнаргыланы, ишәзааигәоу шәҭынхацәагьы Шәаргьы ишәзеиӷьасшьоит агәабзиара, ахирра, ақәҿиарақәа, Аԥсны иқәынхо ауааԥсыра зегьы – анасыԥи аизҳазыӷьареи».

Аҟәа. Ԥхынҷкәынмза 31, 2025 шықәа. Аԥсныпресс.  Аҳәынҭқарра Ахада Бадра Гәынба  Урыстәыла Ахада Владимир Путин Ашықәс ҿыци Қьырса ныҳәеи идиныҳәалеит.

 Адныҳәалараҟны иҳәоуп:

«Ҳаҭыр зқәу Владимир Владимир-иԥа!

Аԥсны жәлар рыхьӡала, хаҭала сара сыхьӡала ишәыдысныҳәалоит иааиуа Ашықәс ҿыци Қьырса ныҳәа лашеи.   

Ииасуа ашықәс Аԥсны Аҳәынҭқарреи Урыстәылатәи Афедерациеи рыбжьара аусеицура аҿиараҟны акрызҵазкуа шықәсны имҩаԥысит. Ҳаидгыларатә еизыҟазаашьақәа есааира аӷәӷәахара иаҿын, ҵак ҿыцла ихаҭәаауа.     

Гәык-ԥсыкала иҭабуп ҳәа шәасҳәоит Аԥсны иашәҭо адгыларазы, ҳтәыла алахьынҵеи уи атәылауаа реизҳазыӷьареи рганахьала иҟашәҵо азҿлымҳаразы.

Ииасуа ашықәс азы аҭыԥ ҷыда ааннакылеит Аиааира Ду 80 шықәса ахыҵра азгәаҭара. Ҳабацәеи ҳабдуцәеи рфырхаҵареи, аԥышәара хьанҭақәеи, жәҩахыреибыҭарала иргаз Аиааира дуи хашҭра рықәӡам, урҭ ҳажәларқәа еидыркылоит, ҳаамҭазтәи аизыҟазаашьақәа аҵак ҷыдеи, аҳаҭырқәҵареи, агәрагареи рыла ихарҭәаауа.

Иалыскаарц сҭахуп агәаартреи аилибакаареи рҟазшьа рыманы имҩаԥысыз ҳаиԥыларақәа. Урҭ акрызҵазкуа азҵаарақәа жәпакы рыӡбара, аԥсны-урыстәылатәи аусеицура  аҿиараҟны алшара ҿыцқәа раартра иацхрааит.

Сгәы иаанагоит ҳазҭало ашықәс ҳусеицураҟны ашьаҿа ҿыцқәа, гәацԥыҳәарала аусеицура, ҳҳәынҭқаррақәа рыбжьара аидгыларатә еизыҟазаашьақәа рырӷәӷәара иаамҭаны иҟалоит ҳәа.

Ҳаҭыр зқәу Владимир Владимир-иԥа, гәык-ԥсыкала ишәзеиӷьасшьоит агәабзиара, агәамч, аихьӡарақәа, Урыстәылатәи Афедерациа иқәынхо ҳаиашьаратә жәларқәа зегьы  — аҭынчра, аизыразра, ахирра, аизҳазыӷьара».

Аҟәа. Ԥхынҷкәынмза 31, 2025 шықәса. Аԥсныпресс. Аҳәынҭқарра Ахада Бадра Гәынба Светлана Џьергьениеи Марина Шьониеи Ашықәс ҿыц рыдиныҳәалеит.  

Аҳәынҭқарра Ахада идныҳәаларатә цҳамҭақәа рҿы иазгәеиҭеит Аԥсны иналукааша аԥызацәа рыԥшәмаҳәсақәа атәыла аҭоурых аҿы инарыгӡаз хәызмаӡам ароль.

Светлана Џьергьениа лахь адныҳәалара аҿы ахәҭакахьала иазгәаҭоуп:

«Ҳаҭыр зқәу Светлана Ирадион-иԥҳа! Гәык-ԥсыкала ишәыдысныҳәалоит иааиуа Ашықәс ҿыц аныҳәа.

Аҟәа. Ԥхынҷкәынмза 31, 2025 шықәса. Аԥсныпресс. Аԥсны сынтәа зеиҳа еиӷьны абысҭа зуз, шьыжьынӡа еиҳа аныҳәаҿа зкуа, изжәуа  ҳәа ианеицлабуа аамҭазы, егьырҭ атәылақәа рҿы аныҳәа зынӡа даҽакала рҽазыҟарҵоит. Цқьа уахәаԥшыр, еиҳа уамашәа иубаша атрадициагьы ыҟоуп – Копенгаген ачанахқәа рыԥҽра, мамзаргьы аҵҟатәи маҭәа ҟаԥшь рышәҵаны аплошьад аҿы аиԥхныҩлара аҟынӡа – амцхаҵара мацара акәӡам иаҵоу.   Уи иацуп аҭоурых, амаркетинг, зны-зынлагьы аԥсҭазаара ареалтә хымԥадатәра.

Иаагап жәаҩа цыра испаниатәи ажьыргәыцқәа. Алегенда ишаҳәо ала: акурантқәа жәаҩантә еисаанӡа жәаҩа жьаргәыцк афара уахьӡар, усҟан иааиуа ашықәс зегьы уқәманшәалахоит. Иԥшӡами? Жәаҳәарада.  Аха ари «анашанара» ашьҭахь еицырдыруа амцхәаарыхра акризис ауп игылоу. 1909 шықәсазы Аликанта ажь аҽаҩра акыр ирацәахеит: уи аҭира иахьӡаӡомызт. Усҟан афермерцәа иагьырхәыцит игызмалу азнеишьа –ажьыргәыцқәа анасыԥ ахь ацаԥха аҳасабала адгалара. Иџьоушьаша, уи аус ауит: шәы-шықәса рнаҩсгьы аиспанцәа иццакы-ццакуа аҵх аҩшамҭаз ажьыргәыцқәа лбаардоит, насыԥ шроуа азхаҵаны, азаҵәҭиратә хәаахәҭыҩцәа ракәзар есышықәса арҭ «анасыԥ зхьыԥшу ажьыргәыцқәа» рыҭира аҟынтәи ицәгьамкәа ахашәалахәы дырҳауеит.

Аҟәа.  Ажьырныҳәамза 1, 2026 шықәса. Аԥсныпресс.   Аҳәынҭқарра Ахада Бадра Гәынба Аԥсны жәлар 2026-тәи Ашықәс ҿыц рыдиныҳәалеит.

***

Ҳаҭыр зқәу сыуаажәлар!

Ииасуа ашықәс сазааҭгыло, зегьы раԥхьаӡа иргыланы иазгәасҭарц сҭахуп иреиҳау ҳаихьӡара. Адунеи аҿы аҭышәынтәалара анмаҷу, имариам аамҭазы, ҳара ҳтәылаҿы аҭынч жәҩан аҵаҟа ахәыҷқәа реизҳареи рҵарадырреи алыршоуп. Ари еиҳау мал ыҟам, уи аиқәырхара зегьы иаҳуалуп.

Ииасуа ашықәс изаамҭанытәым атәыла Ахада иалхрақәа рыла иалагеит. Урҭ рымҩаԥысшьа зынӡа имариамызт, аибарххарагьы ацын, аха ҳажәлар иаадырԥшыз аҟәыӷара ҳараки ахарахәыцреи Аԥсны ԥхьаҟатәи аԥеиԥш азы аҭакԥхықәреи ирыбзоураны  ҳҳәынҭқарра даҽа ԥышәарак қәҿиарала иахысит.

Аҟәа. Ԥхынҷкәынмза 31, 2025 шықәса. Аԥсныпресс. Аԥсни Урыстәылеи «2026-2030 шықәсқәа рзы ареспублика асоциал-економикатә ҿиаразы аҳәынҭқарратә программа анагӡаразы аиқәшаҳаҭра» рыбжьарҵеит.  

Аҟәа. Ԥхынҷкәынмза 31, 2025 шықәса. Аԥсныпресс. Аԥсни Аахыҵ Уаԥстәылеи Рхадацәа Бадра Гәынбеи Алан Гаглоеви иааиуа Ашықәс Ҿыци Қьырса ныҳәеи рзы адныҳәаларақәа еимырдеит.

Иҟарҵаз адныҳәаларақәа рҿы ахадацәа азеиԥш ҭоурых, агәреибагареи акзаареи рыла ишьаҭарку ҳажәларқәа рыбжьара аизыҟазаашьақәа рыиашьаратә ҟазшьа инаҵшьны иазгәарҭеит.

Бадра Гәынба игәалаиршәеит ааигәа аԥснытәи аделегациа Аахыҵ Уаԥстәыла ашьақәгылара Амш 35- шықәса ахыҵра инамаданы Цхьынвал аҭаара, аҩганк реиԥылара иаҵаз аԥхарра, агәаартра атәы азгәеиҭеит.  

Аҟәа. Ԥхынҷкәынмза 31, 2025 шықәса. Аԥсныпресс. Урыстәылатәи Афедерациа Аиҳабыра Ахантәаҩы Михаил Мишустин Аԥсны Аҳәынҭқарра Ахада Бадра Гәынба Ашықәс Ҿыци Иаса Қьырса Иира Амши идиныҳәалеит.