Аҟәа. Нанҳәамза 30, 2025 шықәса. Аԥсныпресс. Аҳәынҭқарра Ахада Бадра Гәынба Белорусиа Ахада Алеқсандр Лукашенко Иира амш идиныҳәалеит.

Аҟәа. Нанҳәамза 30, 2025 шықәса. Аԥсныпресс. Аԥсны аҩныҵҟатәи аусқәа Рминистрра Аҳәынҭқарратә автоинспекциа Аусбарҭа аиҳабы Дамеи Аҩӡба аҵарашықәс алагара аламҭалазы атәылауаа рахь ааԥхьара ҟаиҵеит. Иара арҵаҩцәеи аҭаацәеи Адырра Амш рыдиныҳәалеит, убри аан амҩақәа рҿы ашәарҭадара, аиҳарак цәыббрамза раԥхьатәи амшқәа рзы, амҩадуқәа рҿы ашколхәыҷқәа еиҳа ианырацәахо, акыр агәҽанызаара аарԥшра шхымԥадатәиу азгәеиҭеит.

Аҟәа. Нанҳәамза 28, 2025 шықәса. Аԥсныпресс. Аԥсны адәныҟатәи аусқәа рминистр Олег Барцыц Аԥсны иҟаз Аахыҵ Уаԥстәыла Аҷыдалкаатә зинмчы змоу ацҳаражәҳәаҩ Олег Боциев иԥсҭазаара дахьалҵыз инамаданы адышшылара ҟаиҵеит.

Аҟәа. Нанҳәамза 29, 2025 шықәса. Аԥсныпресс.  Иԥсҭазаара далҵит Алеқсандр  Банников – Алада Урыстәыла Аолимпиатә академиа раԥхьатәи ахада ихаҭыԥуаҩ, амҵәышәмпыл азы Урыстәыла Асоветтә Федералтә Социалтә Республикеи (РСФСР) Аԥсни зҽаԥсазтәыз азыҟаҵаҩ, Урыстәыла зҽаԥсазтәыз абаҩарҵәыра аусзуҩ, Аԥсны, Адыгеиа, Жәлартә Республика Болгариа Бургасстәи аокруг ҳаҭыр зқәу аспорт азҟаза, апедагогикатә наукақәа ркандидат, абаҩарҵәыреи аспорти атуризми рзы Ҟәбинатәи аҳәынҭқарратә Университет апрофессор, «Ахьӡ-Аԥша» аорден III аҩаӡара занашьаз Алеқсандр Банников.  

Аҟәа. Нанҳәамза 29, 2025 шықәса. Аԥсныпресс. Аԥсны Ахада Бадра Гәынба идҵала Аԥсны иҟаз Аахыҵ Уаԥстәыла ацҳаражәҳәаҩ Олег Боциев иԥсыжра аиҿкааразы аҳәынҭқарратә комиссиа аԥҵоуп.

Аҟәа. Нанҳәамза 29, 2025 шықәса. Аԥсныпресс.  Дамаск ақалақь аҿы, 62-тәи Жәларбжьаратәи ахәаахәҭра-ааглыхратә цәыргақәҵа аҳәаақәа ирҭагӡаны, Ареспублика Аԥсны аделегациа Шьамтәыла иҟоу ачерқьесстә ансамбль аконцерт иаҭааит. Уи инанагӡеит амилаҭтә аԥсуа-дыгатә жәлар рыкәашарақәа, ҳәа адырра ҟанаҵоит Аԥсны адәныҟатәи аусқәа Рминистрра апресс-маҵзура.  

Аҟәа. Нанҳәамза 29, 2025 шықәса. Аԥсныпресс. Аҳәынҭқарра Ахада Бадра Гәынба иҟаиҵаз адҵа инақәыршәаны, сынтәа раԥхьаӡа акәны аҵара Аминистрра атәыла иахьаҵанакуа актәи акласс ахь зшьапы еихызго ахәыҷқәа рзы аҳамҭақәа еиқәнаршәеит, ҳәа адырра ҟанаҵоит Аминистрра апресс-маҵзура.

Аҟәа. Нанҳәамза 29, 2025 шықәса. Аԥсныпресс. Аҳәынҭқарра Ахада ихаҭыԥуаҩ Беслан Бигәаа Анцәадзыхшаз Лылацәеиқәыԥсара амш аҳаҭыраз Очамчыра араион Мықә ақыҭан иҟоу ауахәамаҿы имҩаԥгаз анцәаимҵаныҳәара далахәын, ҳәа адырра ҟанаҵоит Аҳәынҭқарра Ахада ипресс-маҵзура.

Аҟәа. Нанҳәамза 29, 2025 шықәса. Аԥсныпресс.  Аԥсны иҟаз Аахыҵ Уаԥстәыла ацҳаражәҳәаҩ Олег Боциев иԥсҭазаара алҵра инамаданы адышшыларақәа аауеит.

***

Аахыҵ Уаԥстәыла Ахада Алан Гаглоев Аԥсны иҟаз Аахыҵ Уаԥстәыла ацҳаражәҳәаҩ Олег Боциев иԥсҭазаара алҵра инамаданы адышшыларатә шәҟәы ааишьҭит.

«Гәалсра дула исыдыскылеит Олег Илиа-иԥа иаамҭанымкәа иԥсҭазаара дшалҵыз азы ажәабжь хьанҭа. Иара иԥсҭазаара зегьы Аԥсадгьыл амаҵзура иазикит, аиашьаратә республика Аԥсны иахәҭоу аҩаӡараҿы Аахыҵ Уаԥстәыла ахаҭарнакра наигӡон, Аахыҵ-уаԥстәылеи Аԥсни рыбжьара аимабзиаратәи аиашьаратәи аизыҟазаашьақәа рырҿиара аус аҿы илагала дууп», - ҳәа иаҳәоит адышшыларатә цҳамҭа атекст аҿы.

Алан Гаглоев «Олег Боциев гәыкала зыԥсадгьыл бзиа избоз, зыжәлар реизҳазыӷьара азы зыхшыҩи зылшареи иамеигӡоз ауаҩы иаҳасабала игәалашәара наунагӡа ҳгәаҵаҿы иаанхоит» ҳәа инаҵшьны иазгәеиҭеит. Алан Гаглоев зыԥсҭазаара иалҵыз ацҳаражәҳәаҩ иуацәеи иҭынхацәеи, иара убас иҩызцәеи аус ицызуази зегьы дрыдышшылеит.  

Сухум. 28 августа 2025. Апсныпресс. 72 шықәса дшырҭагылаз иԥсҭазаара далҵит 1992-1993шш. Аԥсны жәлар Рџьынџьтәылатәи еибашьра аветеран, Аԥсны иҟаз Аахыҵ Уаԥстәыла ацҳаражәҳәаҩ Олег Боциев. Абри азы ҟанаҵоит Аԥсны адәныҟатәи аусқәа рминистрра.

Олег Боциев иԥсҭазаара дшалҵыз азы адырра зауз Аҳәынҭқарра Ахада Бадра Гәынба Аԥсны иҟоу Аахыҵ Уаԥстәыла ацҳаражәҳәаҩ иҭаацәа дрыдышшылеит.

Аҳәынҭқарра Ахада иара убас Аахыҵ Уаԥстәыла ахада Алан Гаглоев диацәажәеит ҳәа аанацҳауеит апресс-маҵзура.

«Олег Илиа-иԥа Аԥсны жәлар Рџьынџьтәылатә еибашьра даветерануп, Аԥсни Аахыҵ Уаԥстәылеи дырпатриот дуун. Ҳҳәынҭқаррақәа реиҩызара арӷәӷәаразы иҟаиҵаз рацәоуп. Иҭаацәеи иҩызцәеи ҳрыцгәырҩоит», — ҳәа иеиҳәеит иколлега Бадра Гәынба.