Аҟәа. Рашәарамза 18, 2025 шықәса. Аԥсныпресс. Аҟәа ақалақь аҿы иҟоу Москва Аҩны 600 нызқь мааҭ рыхә 200 инареиҳаны амедицинатә маҭәарқәеи аалыҵқәеи рзаанахәеит Гагратәи ареабилитациатә центри Аҟәатәи ақалақьтә поликлиникеи №1.

Аҟәа. Рашәарамза 18, 2025 шықәса. Аԥсныпресс /Алеқсеи Шамба/. Гьаргь Гәлиа иажәабжь «Ахьатә ҩны» ала иҭыху афильм «Аԥҵара» («Сотворение») дырбан Аурыс драматә театр аҿы, иара ҭырхижьҭеи 55 шықәса рышьҭахь.

Гьаргь Гәылиа иповест «Ахьатә ҩны» ашьаҭала Џьума Аҳәба исцинари ала 1970 шықәсазы, арежиссиор — Николаи Машьенко ила иҭыхын. 51-минуҭ ицо афильм аурысшәахьынтә асинхронтә еиҭагара амоуп, иахьанӡа аԥснытәи ахәаԥшцәа шамахамзар идыдмырбаӡацызт.

Аҟәа. Рашәарамза 18, 2025 шықәса. Аԥсныпресс.  Рашәарамза  14, 2025 шықәса инаркны Аԥсны ирыҭоуп 4 934 нызықь урыстәылатәи ахкы амашьынарныҟәцаразы азин аршаҳаҭгақәа.   

Автоҳәынҭинспекциа аиҳабы Дамеи Аҩӡба Аԥсныпресс акорреспондент диҿцәажәҿо, урыстәылатәи амашьынарныҟәцаразы азин аршаҳаҭгақәа раиуразы  зынӡа ирыдкылоуп 6 442 зыҳәамҭа, урҭ рахьынтә иҟаҵоуп – 5699 цыра аршаҳаҭга ҳәа адырра ҟаиҵеит.

Аҟәа. Рашәарамза 18, 2025 шықәса. Аԥсныпресс. Абаҩарҵәыреи аспорти русхкы аҿы аԥсны-урыстәылатәи аусеицура аҿиара иазкын аҿари аспорти русқәа рзы имҩаԥысыз аусуратә еиԥылара.

Аиԥылара имҩаԥысраны иҟоу Урстәылатәи Афедерациеи Аԥсны Аҳәынҭқарреи рыбжьара асоциал-економикатә усеицура азы Анапхгарабжьаратәи акомиссиа изаамҭанытәиу аилатәара аҽазыҟаҵара аҳәаақәа ирҭагӡаны имҩаԥысит, ҳәа адырра ҟаҵоуп Аҳәынҭеилакы аофициалтә саит аҿы.

Аҟәа. Рашәарамза 18, 2025 шықәса. Аԥсныпресс.  Аԥсны Аҳәынҭқарра Аконституциеи «Административ-дгьылҵакыратә акқәа рыҟны напхагараҭаразы» азакәани инарықәыршәаны, Аԥсны Аҳәынҭқарра Ахада Гәынба Бадра Хәынҵариа Руслан даҽа усурак ахь ииагара инамаданы, Пицунда ақалақь ахада ин.н. имаҵураҟнытә ихы ақәиҭтәразы Аусԥҟа инапы аҵаиҩит.

Аҟәа. Рашәарамза 18, 2025 шықәса. Аԥсныпресс. Аԥсны инхо Урыстәыла атәылауаҩра змоу атәанчаҩцәа атәанчахәы роулоит абанктә хсаалага  ПСБ ахь мацара, абри атәы аанацҳауеит абанк апресс-маҵзура.

Атәанчахәқәа ПСБ ахсаалагақәа рахь мацара ахыԥхьаӡалара аԥҟарақәа рҽырыԥсахуеит нанҳәамза инаркны. Иааиԥмырҟьаӡакәа Аԥсны инхо атәанчаҩцәа абанк ПСБ ахсаалагақәа аиуразы заанаҵы иманшәалоу аамҭа алхны рыҽҭарҩыр рылшоит, хәыда-ԥсадатәи аҭел ала. Иара убас ареспублика иахьаҵанакуа иаарту Аԥсны Аҵәахбанк аҟәшақәа 12 иадҵаалар рылшоит.

Иахьыҟоу аҭыӡҭыԥқәа ахсаалаҿы иарбоуп.

Аҟәа. Рашәарамза 17, 2025 шықәса. Аԥсныпресс. Аԥсны Аҳәынҭқарра Ахада Гәынба Бадра Аԥсны ақалақьқәеи араионқәеи р-Администрациақәа рхадацәа алархәны аилацәажәара мҩаԥигеит. 

Аилацәажәара аусура иалахәын Ахада Ихаҭыԥуаҩ Бигәаа Беслан, атәыла аԥыза-министр Делба Владимир, Ахада Иусбаҭа анапхгаҩы Ешба Беслан, Ахада Иусбарҭа анапхгаҩы актәи ихаҭыԥуаҩ  Шамба Дмитри.

Ахада аилацәажәараҟны ирылаиҳәеит даҽа усурак ахь ииагара инамаданы, Пицунда ақалақь ахада ин.н. Хәынҵариа Руслан имаҵураҟнытә ихы дшақәиҭтәу. 

Аҟәа. Рашәарамза 17, 2025 шықәса. Аԥсныпресс. Уаанӡатәи адепутат Адгәыр Ҳаразиа иҩны деихсит ҳәа гәҩарас ирымоу Баграт Сурмаа мызкы ҳәа дырбаандаҩуп. Рашәарамза 16, 2025 шықәса рзы Аҟәа ақалақьтә ӡбарҭа ахь инашьҭын Аҟәа ақалақь аҩныҵҟатәи аусқәа Русбарҭа аусеилыргаҩ еиҳабы Милана Габлиа лҟынтәи  Аԥсны Ашьаустә Закәанеидкыла ахәҭаҷ 217, ахәҭа  2, ахәҭаҷ  164 рыла иазԥхьагәаҭо ацәгьоурақәа  рзы игәҩароу Баграт Сурмаа ирбаандаҩразы азыҳәа. Абри атәы аанацҳауеит Аԥсны аҩнуҵҟатәи аусқәа рминистрра.

Аҟәа. Рашәарамза 17, 2025 шықәса. Аԥсныпресс. Аԥсны Ахада Бадра Гәынбеи Урыстәыла аекономикатә ҿиара аминистр ихаҭыԥуаҩ Дмитри Вольвачи 2026-2030 шықәсқәа рызтәи Аԥсны асоциал-економикатә ҿиара Аҳәынҭқарратә программа анагӡаразы Аиқәшаҳаҭра анапаҵаҩразы еиқәшаҳаҭхеит.

«Ҳара иаадыруеит Урыстәыла аганахьала Аԥсны 2022 – 2025 шш. ареспублика асоциал-економикатә ҿиара апрограмма анагӡара аҳәаақәа ирҭагӡаны иаиуа ацхыраара дуӡӡа атәы. Ииашаҵәҟьаны, иҳаҩсыз хышықәса ирылагӡаны, Аԥсны асоциал-економикатә ҿиара адгылара аҳәаақәа ирҭагӡаны, шамахамзар аекономика ахырхарҭақәа зегьы рҿы алҵшәа бзиақәа ҳауит, атәыла аҩныҵҟа ахархәаразы иҭрыжьуа атауарқәеи амаҵзурақәеи рыхәԥса ашьҭыҵра аҭыԥ амоуп, бжьаратәла аулафахәы ашьҭыхра, аинвестициақәа рыцлара… Ҳара Урыстәылатәи Афедерациа аҟынтәи иҳауа адгылареи ацхыраареи рзы иҭабуп ҳәа раҳҳәоит Шәара аԥхьа шәнаргыланы уи аус знапы алаку зегьы», – ҳәа иазгәеиҭеит Бадра Гәынба. Аҳәынҭқарра Ахада ҷыдала иазгәеиҭеит Урыстәыла асоциалтә усхкы аҿы Аԥсны ианаҭо ацхыраара. Аҳәынҭқарра ахада иациҵеит, ареспубликазы даара акыр шаҵанакуа абизнес маҷ адгылара апрограмма ацҵара. Сынтәа уи 326 миллион мааҭ еицазоурыжьуеит. «Ҳәарада, уи атәыла аекономика аҿиара, иҿыцу аусуратә ҭыԥқәа раԥҵара иацхраауеит», - ҳәа иҳәеит Бадра Гәынба.

Аҟәа. Рашәарамза 17, 2025 шықәса. Аԥсныпресс. Аҩныҵҟатәи аусқәа Рминистрра анаркотикатә маҭәашьарқәа реикәыршара ахылаԥшра аҭаразы Аусбарҭа аусзуҩцәа аоператив-ԥшааратә усмҩаԥгатәқәа рымҩаԥгараан дааныркылеит Аԥсны арҩашьыгатә маҭәашьарқәа алаирҵәон ҳәа гәҩарас ирымаз, 1990 шықәсазы ииз, Новосибирсктәи аобласт аҿы инхо ахаҵа Булава Владимир Владимир-иԥа. Уи идырбалеит иагьимырхит зыкапан рацәоу анаркотикатә маҭәашьар.